Ditë zije në familjen papnore: vdes një nga laiket e shuguruara, në shërbim të Papës.
(24.11.2010 RV)Ditë zije për familjen papnore: sot paradite vdiq në Romë,
laikja e shuguruar, Manuela Kamanji, një nga katër gratë, që njihen me termin latin
Memores Domini, në shërbim të Benediktit XVI, në apartamentin papnor. Gruaja u shtyp
mbrëmë nga një automobil në rrugën Nomentana. Përpjekjet për ta shpëtuar, duke e operuar,
pasi u mbart në Poliklinikën Umberti I, nuk patën asnjë rezultat. Në librin-intervistë
“Drita e botës”, botuar dje, Papa përshkruan edhe çaste nga jeta e përditshme, që
i kalon së bashku me dy sekretarët e posaçëm si dhe me katër Memores Domini. Para
se të vihej në shërbim të Papës, Manuela Kamanji pati shërbyer në Tunizi, kur ishte
ipeshkëv imzot Fuad Tval. Bashkësia e Radio Vatikanit i shpreh afërsinë familjarëve
dhe familjes papnore, në zi për humbjen e Manuelës.