Кс. Ламбардзі: Папа не даваў дазволу на ўжыванне прэзерватываў
Святы Айцец Бэнэдыкт
XVI не праводзіць рэформы і не змяняе навучання Касцёла, а толькі пацвярджае яго,
указваючы на перспектыву каштоўнасці і годнасці чалавечай сексуальнасці як выражэння
любові і адказнасці. Так кіраўнік Прэс-службы Апостальскай Сталіцы кс. Фэдэрыко Ламбардзі
SI каментуе паведамленні СМІ, якія сенсацыйна цытуюць вырваныя з кантэксту фрагменты
кнігі «Святло свету», што ўяўляе сабой інтэрв’ю з Бэнэдыктам XVI і павінна выйсці
23 лістапада 2010 г. Мас-медыя адкрыта кажуць пра «рэвалюцыйны паварот» у стаўленні
Касцёла да антыканцэпцыі.
Пантыфік, адказваючы на пытанне журналітса Пэтэра
Сівалда, сказаў дакладна так: “Засяроджванне ўвагі толькі на прэзерватыве азначае
баналізацыю сэксуальнасці, а гэтая баналізацыя з’яўляецца небяспечнай прычынай, з-за
якой так шмат асобаў ужо не бачыць у сэксуальнасці выразу сваёй любові, але толькі
своеасаблівы наркотык, які самі ўжываюць. Пагэтаму барацьба з баналізацыяй сэксуальнасці
– гэта частка велізарнага намагання, каб сэксуальнасць ацэньвалася пазітыўна і магла
аказваць свой пазітыўны ўплыў на чалавечую істоту як цэласнасць. Могуць узнікаць паасобныя
зразумелыя выпадкі, напрыклад, калі прэзерватыў выкарыстоўвае прастытутка, і гэта
можа быць першым крокам у кірунку маралізацыі, першае ўзрушэнне адказнасці, каб развіць
новую свядомасць факту, што не ўсё дазволена і не можна рабіць усяго, на што маеш
жаданне. Аднак гэта не праўдзівы спосаб пераадолення ВІЧ. Сапраўды, існуе неабходнасць
гуманізацыі сексуальнасці”
Дырэктар Прэс-службы Ватыкана ўказвае на паслядоўны
падыход Бэнэдыкта XVI да справы прадухілення СНІДу і ўжывання прэзерватываў. Святы
Айцец узняў гэтую тэму ўжо падчас свайго афрыканскага падарожжа ў сакавіку 2009 г.,
указваючы на асноўнае значэнне ўстрыманасці і вернасці — каб пазбегнуць эпідэміі.
Таксама ў інтэрв’ю з Пэтэрам Сівалдам ён перасцярог перад баналізацыяй чалавечай сексуальнасці,
якая можа скрывацца за прапагандаваннем прэзерватываў.
«Пантыфік абсалютна
не апраўдвае маральна неўпарадкаванае сексуальнае жыццё, — чытаем ў ватыканскай заяве.
— Ён, аднак, лічыць, што ўжыванне прэзерватываў пры небяспецы заражэння з’яўляецца
„першым актам адказнасці“. Гэта быў бы „першы крок на шляху да больш чалавечай сексуальнасці“,
чым калі б жыццё іншага чалавека падвяргалася шкодзе без ужывання прэзерватываў».
Прадстаўнік Апостальскай Сталіцы звяртае ўвагу, што ў гэтым меркаванні няма нічога
рэвалюцыйнага і такую ж пазіцыю займаюць многія знаўцы маральнай тэалогіі і ўлады
касцёльныя.
«З іншага боку, праўдай з’яўляецца тое, што мы яшчэ не чулі гэтага
з вуснаў Папы, хоць ён гаварыў пра гэта ў размоўнай форме, якая не была дактрынальным
навучаннем Magisterium», — дадае кс. Ламбардзі. Адзначае пры гэтым, што Бэнэдыкт XVI
адважна і ясна спаборнічае з гэтай дыскусійнай тэмай, адкідваючы, з аднаго боку, «давер
прэзерватывам», а з іншага — падыходзячы з разуменнем да людзей, якія крыху на вобмацак
шукаюць больш чалавечага і адказнага перажывання сексуальнасці.