Takim Obama-Medvjedjev në fund të mbledhjes së NATO-s në Lisbonë
(22.11.2010 RV)Presidenti i SHBA-ve, Barak Obama pati dje një takim të paparashikuar
me kreun e Federatës Ruse, Dmitrij Medvjedjev, me të cilin bisedoi për 15-20 minuta,
në përfundim të mbledhjes së Këshillit NATO-Rusi në Lisbonë. Takimi u zhvillua pa
dëshmitarë, vetëm në praninë e përkthyesit. U kërkua nga presidenti Obama e sipas
lajmeve gjysëm zyrtare, ishte shumë i përzemërt. U bisedua për gjendjen në Gjeorgji
dhe për vështirësitë pas ratifikimit të Traktatit Start për çarmatimin nga ana e SHBA-ve. Nga
ana e tij, presidenti rus foli me gazetarët, duke e quajtur mbledhjen historike. Përsa
i përket planit të NATO-s për mbrojtjen me raketa, Medvjedjev sqaroi se Rusia mund
të marrë pjesë, por kjo do të shihet në të ardhmen. Pati pra një hap përpara të Kremlinit,
në krahasim me kundërshtimet e tij, kur instalimi i raketave në Poloni e në Republikën
Çeke u propozua për herë të parë nga ish-presidenti amerikan Xhorxh Bush. Medvjedjev
sqaroi gjithashtu se Rusia nuk do të instalojë raketat e veta në Kaliningrad dhe se
e ka anulluar kontratën për shitjen e raketave S300 në Iran.