(18.11.2010 RV)Të dashur dëgjues, kemi arritur në emisionin e 75-të të ciklit
tonë radiofonik për shpjegimin e fjalëve, që shpesh dëgjojmë në Kishë. Sot do të flasim
për “përvujtërinë” e për mënyrën si e kuptojnë atë të krishterët.
“Sa
më i madh të jesh, përule vetveten në çdo gjë, e do të gjesh hir para Hyjit” shkuhet
në Librin e Siracidit (3,20) e pastaj, në Letrën e Shën Palit drejtuar Filipianëve
(2,3): “Me përvujtëri mbani njëri-tjetrin më të madh se veten” e akoma, në
Letrën e parë të Shën Pjetrit (5,5): “Hyji u kundërshton madhështorëve, kurse të
përvujtëve u jep hirin”. Krejt Bibla është thellësisht e mbrujtur me temën e përvujtërisë,
e cila është vendimtare për moralin e krishterë, sepse mëkati i rrjedhshëm, i pari
i njeriut, është pikërisht mendjemadhësia. Njeriu deshi “të ishte si Zoti”, siç i
propozon gjarpri tundues në kopshtin e Edenit. Përvujtëria në Shkrimin e Shenjtë
shihet edhe si gjendje shoqërore, që përkon me situatën e të varfërve, të të fundmëve,
të të shtypurve. Por pa dyshim, i kushtohet rëndësi të veçantë gjendjes së brendshme,
sjelljes së zemrës së njeriut dhe vendimeve që ai merr për jetën. Shembull në këtë
drejtim, është shën Gjon Pagëzuesi, i cili, pa turp, përpara Krishtit, deklaron se
“Nuk është i denjë as të ulet para tij për t’ia zgjidhur rripin e sandaleve” (Mk
1,7). Nga ana e tij, edhe Jezu Krishti paraqitet pa hezitim si “zemërbutë e i përvujtë”
(Mt 11,29), gjithnjë i gatshëm t’i kuptojë njerëzit, duke i falur pa i gjykuar. Madje,
ai përfaqëson – në vazhdën e asaj kënge të mrekullueshme për fëmijërinë, që është
Psalmi 131 – fëmijën, me thjeshtësinë dhe besimin tek të tjerët, që bëhet pastaj model
për ata që do të hyjnë në Mbretërinë e Zotit (Mt 18,4). Edhe nëna e tij, Maria, kur
i thur lavde Hyjit për veprat e mëdha që po bën me të, kujton se kjo ishte e mundur,
sepse Zoti pa në të “Përvujtërinë e shërbëtores së vet” e Magnifikati, që ajo
këndon në atë moment, është vërtet portreti i të përvujtëve të kësaj toke, me të cilët
vihen në antitezë mendjemëdhenjtë, të fuqishmit, të pasurit (Lk 1,46-55). Për këtë
arsye, Zoti reagon drejtpërdrejt e sistematikisht, duke zgjedhur gjithnjë “të dytin”,
pra atë që nuk ka të drejta e pushtet, siç bëri me Jakobin, Moisiun, Davidin e me
vetë Izraelin, “më të voglin e të gjithë popujve” (Lp 7,7). Zoti kundërshton
krenarët, duke i sfiduar në një duel, që Isaia profet e pikturon me fjalë të forta
e poetike në elegjinë për mbretin e Babilonisë, një faqe e bukur për t’u lexuar e
medituar, në kapitullin 14 të librit të tij (4-23). Në këtë linjë, edhe Jezusi do
të vendosë një ligj, që ka vlerë për sytë e Hyjit: “Kushdo e lartëson veten,
do të përvujtërohet e kush e përvujtëron vetveten, do të lartësohet” (Lk 14,11);
“Kush krenohet do të përvuhet e kush përvuhet do të lartësohet” (Mt 23,12). Besimtari
duhet të zgjedhë gjithnjë përvujtërinë, siç na tregon shembëlltyra e publikanit dhe
e fariseut, e cila e ngre në qiell përvujtërinë kundër krenarisë hipokrite (Lk 18,10-14).
Edhe Libri i Fjalëve të Urta përsërit dy herë: “lavdisë i prin përvujtëria”
(15,33; 18,12). Vërtet, të mos harrojmë atë që thoshte shkrimtari katolik francez
Zhylien Grin (1900-1998): “Nëse nuk do të jemi të përvujtë, Zoti do të na e ulë hundën”.