Në mesazhin për Konferencën Ndërkombëtare të Baritorisë së Shëndetit, Papa kërkon
të sigurohet kurimi për të gjithë
(18.11.2010 RV)“Bota e shëndetësisë nuk mund t’i lerë mënjanë rregullat morale,
që duhet ta udhëheqin për të mos u bërë çnjerëzore”: kështu shkruan Benedikti XVI
në mesazhin për pjesëmarrësit e Konferencës XXV ndërkombëtare të Këshillit Papnor
për Punonjësit e Shëndetësisë, që u hap sot paradite në Vatikan. Mbledhja, që do të
përfundojë nesër, përqendrohet mbi temën “Për kujdesin e barabartë dhe njerëzor ndaj
shëndetit në dritën e Enciklikës ‘Caritas in veritate’”. Në mesazhin e lexuar nga
sekretari i shtetit të Vatikanit, kardinali Tarçizio Bertone, Papa u kërkon qeverive
dhe institucioneve ndërkombëtare të sigurojnë kurimin për të gjithë, sidomos për më
nevojtarët. “Është e nevojshme – shkruan Ati i Shenjtë – të impenjohemi më shumë,
në të gjitha nivelet, që e drejta për kurim të bëhet efektive”. Papa u kërkon punonjësve
të shëndetësisë ta bëjnë më njerëzor sistemin shëndetësor, duke i kuruar të sëmurët
sipas nevojave e jo sipas mundësive të tyre financiare. “Promovohet drejtësia – vazhdon
Benedikti XVI – kur pranojmë jetën e tjetrit e marrim përsipër përgjegjësi për të,
duke iu përgjigjur kërkesave të tij e duke parë në të fytyrën e Birit të Zotit”. Papa
denoncon prirjen për ta kthyer edhe shëndetin në terren për konsumizmin farmakologjik,
mjekësor e kirurgjik, ndërsa nga ana tjetër, miliona njerëz në botë nuk arrijnë të
kenë as ilaçet për kurim. Ati i Shenjtë kritikon ashpër teknikat e riprodhimit, që
shkatërrojnë embrionet, si edhe eutanazinë. Pastaj, u drejtohet të sëmurëve,
duke u shprehur afërsinë e vet shpirtërore e së fundi, i fton të gjithë ta shohin
botën me sytë e Krijuesit, pasi vetëm kështu, njerëzimi mund të mësojë si të jetojë
në këtë botë, në paqe e drejtësi.