Atë Federiko Lombardi: Selia e Shenjtë denoncon shkeljen e lirisë fetare në Kinë.
(18.11.2010 RV)“Selia e Shenjtë hidhërohet shumë për lajmet që vijnë nga Kina
sipas të cilave, një pjesë e ipeshkvijve që njohin Papën janë të detyruar nga funksionarë
të qeverisë të marrin pjesë në një shugurim ipeshkvnor të paligjshëm në Çengde, parashikuar
për më 20 nëntor.” Kështu pohoi sot për shtypin drejtori i Sallës së Shtypit të Vatikanit
Atë Federiko Lombardi duke iu përgjigjur pyetjeve të gazetarëve në lidhje me këtë
temë. “Nëse këto lajme do të ishin të vërteta – deklaroi Atë Lombardi, atëherë
Selia e Shenjtë do t’i quajë këto veprime si një shkelje e rëndë e lirisë fetare dhe
të ndërgjegjes. Po ashtu, një shugurim i tillë do të quhet i paligjshëm dhe i dëmshëm
për marrëdhëniet konstruktive që janë zhvilluar kohët e fundit ndërmjet Republikës
Popullore të Kinës dhe Selisë së Shenjtë.” Më tej Atë Lombardi pohoi se meshtari
për të cilin bëhet fjalë, “atë Jozef Guo Zhinkai, nuk e ka marrë miratimin e Atit
të Shenjtë për t’u shuguruar ipeshkëv i Kishës Katolike. “Selia e Shenjtë, me dëshirën
për t’i zhvilluar marrëdhëniet e mira me Kinën, ka marrë kontakt me autoritetet kineze
mbi këtë çështje duke e bërë të ditur qartë njëherësh edhe pozicionin e vet.” – përfundoi
Atë Lombardi.