Në sheshin e Shën Pjetrit delegatët Caritas-Migrantes për t’i dhuruar Papës përmbledhjen
10 vjeçare të dosjeve të emigracionit
(17.11.2010 RV)Një delegacion i madh i Karitasit Italian dhe i Fondacionit
“Migrantes” të Konferencës Ipeshkvnore Italiane mori pjesë sot paradite në audiencën
e përgjithshme të Benediktit XVI. Në përfundim të saj, veprimtarët i dhuruan Papës
dosjet e emigracionit, ku përmblidhen statistika e reflektime mbi gjendjen e të huajve
në Itali, gjatë 10 vjetëve të fundit. Vetë Dosja e puna për përpilimin e saj mbushin
20 vjet. Cili është bilanci? Folëm me drejtorin e përgjithshëm të Fondacionit “Migrantes”,
imzot Xhankarlo Perego: Bilanci është
pozitiv, pasi me dosjen janë rritur dhe pjekur punonjës kërkimorë të kësaj fushe.
Është një takim ndërmjet punonjësve italianë dhe të huaj. Kemi paraqitur në mijëra
shkolla fenomenin e emigracionit, i cili merr gjithnjë e më tepër tipare rajonale.
Tema e emigracionit krijon konflikte. Është e nevojshme një kulturë, që të dijë ta
interpretojë si duhet këtë qytetërim të ri, i cili po lind nga takimi ndërmjet personave
me 198 kombësi të ndryshme në një territor, që deri dje, njihte vetëm njerëz, të lindur
e të rritur në të njëjtin qytet, me të njëjtën kulturë.