Ipeshkvijtë e Haitit: të gjithë të mobilizohen kundër kolerës. Vendi drejt zgjedhjeve
në mesin e vështirësive
(17.11.2010 RV)“Të mobilizohemi, të bashkojmë forcat për të ndalur përhapjen
e shpejtë të kolerës”: kjo është thirrja e ipeshkvijve të Haitit, që u drejtohet mjekëve,
vullnetarëve, gazetarëve, edukatorëve dhe krerëve të fesë për të shpëtuar ç’mund të
shpëtohet nga epidemia e kolerës, e cila ka shkaktuar mëse njëmijë të vdekur e 17
mijë të shtruar nëpër spitale. Përhapja e kolerës shqetëson edhe bashkësinë ndërkombëtare,
për pasojat shoqërore dhe politike, që mund të ketë mbi Haitin. Gjendja, e rëndë që
nga tërmeti i janarit të kaluar, po krijon tensione në popull, në prag të zgjedhjeve
presidenciale dhe legjislative të 28 nëntorit. Por a mund të shkohet drejt votimeve
në këtë situatë? Të dëgjojmë gazetarin italian, Marko Belo, i sapokthyer nga Haiti: Teknikisht –
e ndoshta edhe politikisht – nuk ekzistojnë kushtet për të bërë zgjedhjet. Por, problemi
është se njerëzit janë të lodhur nga mënyra si po e administron qeveria rindërtimin
e vendit, prandaj, ndryshimi është i nevojshëm. Gjendja është shumë e vështirë: janë
regjistruar 4 milion zgjedhës, por në fakt, akoma nuk dihet se kush e ka kartën e
votimit. Një qeveri e re do t’i zgjidhte problemet, sipas jush? Sigurisht,
njerëzit duan ndryshime e institucione të qëndrueshme. Faktikisht, kjo qeveri e ka
përjashtuar krejtësisht shoqërinë civile nga procesi i analizës së nevojave të vendit
e nga rindërtimi i tij, duke e lënë gjithçka në dorën e bashkësisë ndërkombëtare.
Por, në të vërtetë, administrimi bëhet në mënyrë kaotike, sepse ndërhyhet sipas qejfit
e kjo qeveri nuk është në gjendje t’u japë rregulla e plane organizatave joqeveritare
ndërkombëtare, apo edhe vetë OKB-së. Kjo do të thotë se 10 muaj pas tërmetit, praktikisht,
askush nuk ka arritur të hyjë në shtëpinë e vet e njerëzit akoma jetojnë në tenda.
Natyrisht, nëse kjo gjendje do të ishte marrë në dorë që në fillim, kolera mund të
ndalej. Cili e ka përgjegjësinë më të madhe për këtë emergjencë të dyfishtë
në Haiti, për tërmetin dhe për kolerën? Së pari, qeveria, e cila nuk arriti
të mobilizojë shoqërinë civile haitiane. Së dyti, bashkësia ndërkombëtare, së cilës
i mungon koordinimi. Ndryshimi i qeverisë – një qeveri bashkimi kombëtar – dhe përfshirja
e shtresave të ndryshme të shoqërisë haitiane, duke vënë disa rregulla, mund të ndihmojë
në daljen nga kaosi, pasi, vërtet, në këtë çast, Haiti është në kaos të përgjithshëm.