Të kthehemi tek fjala e Zotit: editoriali i atë Lombardit mbi Këshillimin apostolik
“Verbum Domini”
Bëri jehonë të madhe Këshillimi apostolik postsinodal “Verbum Domini”, publikuar të
enjten, që përmbledh reflektimet dhe propozimet e Sinodit të Ipeshkvijve, zhvilluar
në Vatikan, në tetor 2008. Mbi këtë dokument të rëndësishëm të Magjisterit të Benediktit
XVI, të dëgjojmë editorialin javor të drejtorit tonë të përgjithshëm, atë Federiko
Lombardi, njëkohësisht zëdhënës i Selisë së Shenjtë:........... “Pse një
dokument i ri, kaq i gjatë, mbi Fjalën e Zotit? Para 45 vjetësh, Koncili II i Vatikanit
pati publikuar kushtetutën “Dei Verbum”, që shumë e konsiderojnë një nga dokumentet
më të rëndësishme të tij, disa madje, më të rëndësishmin, pikërisht sepse vinte në
dukje burimin, zanafillën e jetës dhe të misionit të Kishës. Ai pati pa dyshim një
rol themelor në rinovimin konciliar, por – siç vëren imzot Ravazi – me kohë, ndihej
“një lloj lëshimi e ngopjeje”, që solli si pasojë, nga ana e specialistëve, “përgjithësimin
e spiritualizmin e vagëllt, ose, në të kundërt, teknicizmin e shterpët”. E kardinali
Oje ka folur qartë për “një defiçit në jetën shpirtërore të popullit të Zotit, i cili
duhet mbushur”. Pra: Shkrimi i Shenjtë është libër feje, që lind nga feja
e popullit të Zotit e mund të kuptohet si duhet vetëm në këtë perspektivë, që duhet
ushqyer nga feja. Dokumenti i ri papnor është kaq i gjerë dhe i pasur, sa
shumë lexues e analistë rrezikojnë të humbasin në aspektet e shumta të përmbajtjes
së tij. Për këtë arsye, po i lejoj vetes të ngul këmbë në këto dy aspekte themelore:
të lexohet dhe të interpretohet Shkrimi i Shenjtë me metodat, që na ofron shkenca,
por në dritën e fesë, për të takuar kështu Fjalën e gjallë të Zotit, Jezu Krishtin;
të jetohet e të praktikohet dëgjimi dhe shërbimi i Fjalës në jetën e përditshme të
Kishës, për t’i ndihmuar besimtarët e krejt njerëzimin të takojnë Zotin, përmes Jezu
Krishtit. Për këtë, Benedikti XVI nuk na jep vetëm një dokument të madh
për t’u studiuar e asimiluar: na jep edhe ndihmë e shembull. Me librin e tij mbi Jezusin
na ofron të gjithëve një model për leximin dhe interpretimin e Shkrimit të Shenjtë,
me homelitë e veta na ofron, në veçanti ne meshtarëve, një model predikimi, që frymëzohet
gjithnjë nga Fjala e Zotit, por harmonizohet e pasurohet me teologji, përshpirtëri,
aktualitet. Mund të shpresojmë vërtet – nën udhëheqjen e tij – në gjallërimin e lëvizjes
së madhe, të dëshiruar nga Koncili II i Vatikanit”.