Վազգէն Ա Հայրապետի Արձանի Բացումը Մայր Աթոռ Ս Էջմիածնի Մէջ։
Մայր Աթոռ Ս Էջմիածնի մէջ, 11 Նոյեմբերին, հանդիսապետութեամբ Գարեգին Բ Ամենայն Հայոց Կաթողիկոսին, տեղի ունեցաւ երջանկայիշատակ Վազգէն Ա Ամենայն Հայոց Կաթողիկոսի արձանի բացման արարողությունը։
Արձանը կանգնած է միջխորհրդարանական համագործակցութեան հայ-ռուսական յանձնաժողովի համանախագահ Նիկոլա Ռիժկովի նախաձեռնութեամբ։ Քանդակագործն է արուեստի վաստակաւոր գործիչ՝ Ֆրիդրիխ Սողոյան։
Հանդիսութեան ներկայ էին Մայր Աթոռի միաբանները, հայ-ռուսական միջխորհրդարանական յանձնաժողովի անդամները, Արմաւիրի մարզպետը՝ Աշոտ Ղահրամանեան, Էջմիածնի քաղաքապետը՝ Կարէն Գրիգորեան, պետական այրեր, մշակոյթի գործիչներ եւ Էջմիածնի բազում բնակիչներ։
Արարողութեան բացումը կատարուեցաւ Մայր Աթոռի միաբան՝ Տ Պարթև աբեղայ Բարսեղեանի խօսքով, որու աւարտին՝ տիար Նիկոլա Ռիժկով ու տիար Ֆրիդրիխ Սողոյան հրաւիրուեցան հանդիսաւոր կերպով կատարելու Վազգէն Ա Հայրապետի յիշատակը յաւերժացնող՝ արձանի բացումը։
Այնուհետև Մայր Աթոռի միաբանութեան անունով Տ Նաթան եպիսկոպոս Յովհաննիսեան երախտագիտութիւն յայտնեց հայ-ռուսական յանձնաժողովի համանախագահ Նիկոլա Ռիժկովին` նաև անդրադառնալով երջանկայիշատակ Հայրապետի մեծ վաստակին և անոր իրականացուցած մարդասիրական ու խաղաղասիրական առաքելութեան, ժողովուրդներու կեանքին մէջ, ինչպէս նաև կարևոր դերակատարութեան հայ-ռուսական բարեկամութեան ամրապնդման գործին մէջ։ Այս առթիւ հայրապետական իր օրհնութեան խօսքին մէջ Գարեգին Բ Կաթողիկոսը ըսաւ. ՜՜Խոնարհինք Վազգէն Ա. երանաշնորհ Հայրապետի յիշատակի առջև աղօթք բարձրացնելով առ Աստուած, որ Տէրը մեր ժողովուրդի զաւակներու հոգիներուն մէջ աճեցնէ երջանկայիշատակ Հայրապետի սերմանած հունտերը։
Շնորհաւորական և երախտագիտութեան խօսքեր արտասանեցին նաև միջխորհրդարանական համագործակցութեան հայ-ռուսական յանձնաժողովի համանախագահը՝ Արամ Սաֆարեան և Էջմիածնի քաղաքապետը՝ Կարէն Գրիգորեան։
Հուսկ՝ Նիկոլա Ռիժկով ներկաները շնորհաւորեց արձանի բացման առընչութեամբ, անդրադառնալով 1988-ի երկրաշարժի աղէտալի օրերուն իր հանդիպումներուն Վազգէն Ա Հայրապետին հետ, որ այդ դժուար օրերուն հաւատք եւ յոյս կը ներշնչէր աղէտեան ժողովուրդին։ Այդ նկատառումով արձանի տեղադրումը տիար Ռիժկով նկատեց ոչ թէ ընծայ, այլ պարտականութիւն մը մեծանուն Հայրապետի յիշատակին։ Արարողութեան աւարտին Վեհարանին մէջ Ամենայն Հայոց Կաթողիկոսը ընդունեց միջխորհրդարանական համագործակցութեան հայ-ռուսական յանձնաժողովի անդամները։
| All the contents on this site are copyrighted ©. |