Papa, e ardhmja e BE-së plot shpresë, nëse mbetët besnike rrënjëve të saj e vlerave.
“Një dialog i frytshëm ndërmjet fesë e arsyes, ndërmjet politikës e religjionit, ndërmjet
ekonomisë dhe etikës, do të mundësojë ndërtimin e një Evrope, e cila duke qëndruar
besnike ndaj rrënjëve të veta të krishtera të pamohueshme, do të mund ti përgjigjet
plotësisht thirrjes së vet e misionit në botë”. Kështu pohoi sot Papa Benedikti
XVI gjatë audiencës së përgjithshme mbajtur në Vatikan, duke përshkuar udhëtimin e
tij të këtyre ditëve në Spanjë. “I bindur në mundësitë e jashtëzakonshme që ka Kontinenti
evropian e me besim në një të ardhme të saj plot shpresë, kam ftuar Evropën – theksoi
Papa – që ti hapet gjithnjë më shumë Zotit, duke favorizuar kështu perspektivat e
një takimit të vërtetë, me respekt e solidar, me popullsitë e qytetërimet e Kontinenteve
tjera”. “Derisa isha në Barcelonë – shtoi Papa Racinger duke folur para mase tetë
mijë besimtarëve e shtegtarëve të pranishëm në sallën e Palit VI në audiencë – i jam
lutur fort Zotit për familjet qeliza jetike e shpresë e shoqërisë dhe e Kishës. Kam
përkujtuar edhe ata që vuajnë, në mënyrë të veçantë në këto momente të vështirësive
serioze ekonomike. Pata para sysh, në të njëjtën kohë edhe të rinjtë, që më kanë
shoqëruar gjatë tërë vizitës sime në Santiago e Barcelonë me entuziazmin e tyre dhe
me gëzimin e tyre, sepse duke zbuluar bukurinë, vlerën dhe angazhimin e Martesës,
ku burri e gruaja formojnë familjen, e cila me bujari e pranon jetën dhe e shoqëron
atë që nga zënia e saj e deri në mbarimin e saj të natyrshëm”. “Gjithçka bëhet për
të mbështetur martesën e familjen, për të ndihmuar njerëzit më nevojtarë, gjithë ajo
që e rritë madhështinë e njeriut e dinjitetin e tij të pacenueshëm, kontribuon -
pohoi Ati i Shenjtë – në përsosmërinë e shoqërisë. Asnjë orvatje nuk është e kotë
në këtë kuptim e drejtim”.