U hap në Romë Asamblea plenare e Komitetit Papnor për Kongresin Eukaristik.
(09.11.2010 RV)Sot paradite, në Romë, u hap Asamblea plenare e Komitetit Papnor
për Kongreset Eukaristike Ndërkombëtare. Pas fjalimit të mirëseardhjes së kryetarit
të Komitetit Papnor Imzot Pjero Marini, e mori fjalën prefekti i Kongregatës së ipeshkvijve,
kardinali Mark Ujé, me një raport mbi kongresin e 49-të eukaristik ndërkombëtar të
Kebekut, mbajtur nga 15-22 qershor 2008. Kongresi, që përfshinte orë katekizmi, takimesh
dhe ceremonishë liturgjike, përqendrohej tek tema “Eukaristia, dhuratë e Zotit për
jetën në botë.” Për nesër, programi i Asamblesë Plenare parashikon edhe paraqitjen
e tekstit bazë të Kongresit të 50-të eukaristik ndërkombëtar që do të mbahet në Dublin
nga 10-17 qershor 2012. Kongresi i Dublinit me temë: “Eukaristia: Bashkimi me Krishtin
dhe mes nesh.”, do të paraqitet nesër nga kryeipeshkvi i Dublinit, Imzot Diarmyd Martin.
“Formulimi i kësaj teme, - është shprehur kohët e fundit imzot Martin, - lindi nga
përputhja e rastësishme e përvjetorëve të kremtimit të Kongresit me 50-vjetorin e
çeljes së punimeve të Koncilit Vatikanas II, i cili “qe një moment përtëritje dhe
thellimi i mësimit të Kishës dhe të vetëdijes si Korp i Krishtit dhe Popull i Zotit.”
Gjatë seancës së nesërme do të paraqitet edhe programi përgatitor për Kongresin e
Dublinit. Takimi do të përfundojë të enjten e ardhshme, ditë kur parashikohet edhe
audienca e Benediktit XVI me pjesëmarrësit në Asamblenë Plenare.