Sot bie 72 vjetori i ‘Natës së kristaleve’ që shënoi shpërthimin e tmerrit nazist
kundër hebrenjve.
Më 8 nëntor 2008, gjatë Lutjes së Engjëllit të Tënzot kremtuar në Sheshin e Shën Pjetrit
në Vatikan, Benedikti XVI kujtoi 70 vjetorin e shpërthimit të tërbimi nazist kundër
hebrenjve, në atë natë që mbeti në histori me emrin ‘Nata e kristaleve’, shprehje
e përdorur me tallje nga nazistët për shkak të vitrinave të thyera në 7500 dyqane
hebrenjsh. Papa Racinger me këtë rast theksoi me forcë se kjo ngjarje nuk duhet harruar
e njerëzimi duhet të bëjë çmos të mos përsëriten kurrë më tmerre të tilla. Kurrë
më tmerre naziste, kurrë më tmerre kundër hebrenjve! Në Lutjen e Engjëllit të Tënzot,
Benedikti XVI kujtoi pra një nga faqet më të trishtuara të historisë, natën ndërmjet
9 e 10 nëntorit të vitit 1938, kur shpërtheu tërbimi nazist kundër hebrenjve. Atë
natë të llahtarshme u vranë 91 vetë, u bënë rrafsh me tokë 267 sinagoga, u internuan
në kampet e vdekjes, 30 mijë hebrenj. Nisi kështu – vijoi të kujtonte Papa – persekutimi
sistematik e i egër i hebrenjve gjermanë, që përfundoi në Shoah – apo në shfarosjen
e tyre në masë:
“Edhe sot ndjej dhimbje për çka ndodhi në atë rrethanë tragjike,
kujtimi i së cilës duhet të shërbejë që tmerre të tilla të mos përsëritën kurrë më
e që të impenjohemi, në të gjitha nivelet, kundër çdo forme të antisemitizmit e të
diskriminimit, duke edukuar posaçërisht breznitë e reja me frymën e respektit e të
mirëkuptimit reciprok. Ju ftoj, veç të tjerash, të luteni për viktimat e asaj kohe
e të bashkoheni me mua, për t’i shprehur solidaritet të thellë botës hebraike”.