Pesë ipeshkvij, që i përkasin Kishës Anglikane, vendosën të bashkohen me Kishën Katolike.
(08.11.2010 RV)Pesë ipeshkvij anglikanë do të largohen nga Kisha e Anglisë
dhe do të hyjnë në shërbimin Ipeshkvnor Apostolik, parashikuar nga Benedikti XVI me
Kushtetutën Apostolike “Anglicanorum coetibus”. Njoftimin e jep Daily Telegraph, duke
cituar edhe deklaratën e kryeipeshkvit të Kantërburit, Rouan Uilljams, primat i Bashkimit
Anglikan, që flet për dorëheqjen e dy ipeshkvijve: Keith Newton (Keit Njuton) dhe
Andrew Burnham (Endrju Bërnhëm), duke shënuar edhe emrat e tre të tjerëve: John Broadhurst
(Xhon Brodhërst), Edwin Barnes (Eduin Bënnes) dhe David Silk (Dejvid Silk) E përditshmja
angleze pohon se të pestët janë të zhgënjyer nga reformat liberale që ka ndërmarrë
Kisha Anglikane vitet e fundit e se duan të hyjnë në Ordinariatin, që do të themelohet
vitin e ardhshëm, duke ruajtur traditat anglikane, edhe pse në bashkim me Romën, për
të mos cënuar kërkimin e përhershëm të bashkimit të plotë të të gjitha Kishave të
krishtera. Për këtë njoftim, drejtori i Sallës vatikanase të Shtypit, atë Federiko
Lombardi, deklaroi gojarisht sa më poshtë: “Lidhur me deklaratën e pesë ipeshkvijve,
të cilët deri tani i përkisnin Kishës Anglikane, që kanë vendosur të bashkohen me
Kishën Katolike, e që, për këtë arsye duhet të japin dorëheqjen nga veprimtaria aktuale
baritore në Kishën e Anglisë, mund të pohojmë se është në studim krijimi i Ordinariatit
të parë, sipas normave të caktuara nga Kushetuta Apostolike “Anglicanorum coetibus”
e se vendimet e mundshme lidhur me këtë çështje, do të komunikohen në kohën e duhur.