Biseda me gazetarët. Papa: të promovohet takimi, jo ndeshja, ndërmjet fesë e laicitetit.
(05.11.2010 RV)Siç është bërë tashmë e zakonshme, gjatë fluturimit të avionit
drejt Spanjës, Papa ceku shkurtimisht temat që përshkojnë shtegtimin e tij të 18-të
apostolik, duke iu përgjigjur pyetjeve të gazetarëve të pranishëm. Në mënyrë të posaçme
uroi që feja e laiciteti të takohen, jo të ndeshen, çështje që luan rol të dorës së
parë në kulturën spanjolle. Papa foli pastaj për përvojën e tij si shtegtar drejt
Santiagos së Kompostelës dhe dha vlerësimin personal mbi veprën e Antoni Gaudí, arkitekt
i Bazilikës së Sagrada Familia të Barcelonës. Një nga përgjigjet, që u interesonte
më shumë gazetarëve, ishte ajo e rolit të dikasterit për Ungjillëzimin e Ri, shoqëruar
me pyetjen tjetër, në se Spanja do të jetë një ndër vendet e para, me të cilat do
të merret organizmi i ri i Vatikanit. Benedikti XVI pranoi sinqerisht se “Spanja ka
qenë “Vendi i zanafillës së fesë”, por edhe vendi ku u zhvillua një laicitet, një
antiklerikalizëm e një shekullarizëm i fortë e agresiv”. Gjithsesi, pohoi Ati i Shenjtë,
horizonti i dikasterit është shumë më i gjërë: “Duke e themeluar këtë dikaster,
mendova për mbarë botën, sepse risia e mendimit, vështirësia për të menduar me konceptet
e Shkrimit Shenjt, të teologjisë, është universale... Por është po aq e vërtetë se
në Spanjë ka lindur një laicitet, një antiklerikalizëm e një shekullarizëm i fortë
e agresiv”. Gjithsesi Papa uroi takimin e jo ndeshjen ndërmjet fesë e laicitetit,
e në këtë takim kultura spanjolle mund të luajë një rol qëndror. Në të njëjtin drejtim
edhe pyejtja për lidhjen ndërmjet fesë, artit e bukurisë. “Ju e dini se unë ngulmoj
fuqimisht mbi lidhjen e fesë me arysen”, u kujtoi Papa gazetarëve, duke shtuar edhe: “..
e vërteta, qëllim e jetë e arsyes, shprehet në bukuri e bëhet dhe vetë bukuri. Prandaj
atje ku ka vërtetësi, duhet të lindë edhe bukuria; atje ku njeriu realizohet si duhet,
realizohet mirë, bën edhe gjëra të bukura. Lidhja ndërmjet së vërtetës e bukurisë
është e pandarë, e prandaj kemi nevojë për bukuri”. Art, fe e bukuri ishin
edhe pikat e referimit të Antoni Gaudí, falë gjenisë së të cilit u ngrit Bazilika
Sagrada Familia e Barcelonës, që Papa do ta kushtojë nesër. E në këtë krijim, ndonëse
të pakryer, vërejti Benedikti XVI, shkëlqejnë në mënyrë të veçantë tre elemente: sinteza
ndërmjet vazhdimësisë e risisë; sinteza ndërmjet kuptimit të Krijimit, Shkrimit Shenjt
e Adhurimit, mesazh shumë i rëndësishëm për ditët tona e, së treti, devocioni për
Familjen e Nazaretit, që e ka rrënjën historike në vitet 1800: “Pikërisht
ky devocion, mund të themi se është aktualiteti më i madh, sepse problemi i familjes,
i përtëritjes së familjes si qelizë themelore e shoqërisë, është tema e madhe e së
sotmes, që tregon se ku mund të shkojmë si në ndërtimin e shoqërisë e në unitetin
ndërmjet fesë e jetës, ashtu edhe në atë ndërmjet fesë e shoqërisë. Familja është
tema themelore, që shprehet këtu, duke na kujtuar se Zoti u bë bir i një familjeje
e na bën thirrje të ndërtojmë familjen e vërtetë e të e jetojmë në të". Më
pas Benedikti XVI u ndalua tek kuptimi i shtegtimit. Të jesh për udhë, theksoi, duke
kujtuar të gjitha qytetet që ka vizituar gjatë jetës, është një shprehje që e gjeni
në jetëshkrimin tim. Por të jesh shtegtar ka edhe kuptimin e thellimit të fesë. Duhet
që nganjëherë, ftoi Papa, të dalim nga e përditshmja, nga bota e fitimit, e dobisë,
e utilitarizmit, për të qenë vërtetë për udhë drejt së mbinatyrshmes: "Kështu
është edhe shtegtimi: jo vetëm dalje nga vetvetja e vogël për të ecur drejt realiteteve
më të mëdha, por edhe ecje së bashku. Mjafton të themi se shtegtimi i Shën Jakut është
një nga elementet e formimit të identitetit të përbashkët evropian, e edhe sot rilind
kjo lëvizje, kjo ëndërr për të qenë në lëvizje, shpirtërisht e fizikisht, për t’u
takuar me të tjerë e për të gjetur kështu heshtjen, lirinë, përtëritjen, për të gjetur
vetë Zotin!”.