Мітрапаліт Кандрусевіч прымае ўдзел у пасяджэнні Папскай рады “Iustitia et Pax”
Пленарная асамблея
Папскай рады «Iustitia et Pax» прысвечана Кампендыю сацыяльнага вучэння Каталіцкага
Касцёла і апошняй энцыкліцы папы Бэнэдыкта XVI «Caritas in veritate» («Любоў у праўдзе»),
— паведаміў беларускай секцыі Ватыканскага радыё арцыбіскуп Тадэвуш Кандрусевіч, які
прымае ўдзел у дадзеным пасяджэнні, што распачалося 4 лістапада 2010 г. На асамблею
прыехала каля 50 прадстаўнікоў з усіх кантынентаў. Працамі пасяджэння кіруе старшыня
ватыканскага ведамства афрыканскі кардынал Пэтэр Тарксан.
Кардынал Тарксан,
звяртаючыся да ўдзельнікаў сустрэчы, перадаў просьбу Святога Айца: працягваючы развіваць
сацыяльнае навучанне Касцёла, аддзяляць пастрыскую дзейнасць Касцёла ад палітычнай
дзейнасці.
Кампендый сацыяльнага навучання Каталіцкага Касцёла ўжо перакладзены
на 30 моў. На жаль, як адзначыў Мітрапаліт Мінска-Магілёўскі, у іх ліку не аказаўся
Кампендый на беларускай мове, які ўжо перакладзены і зацверджаны Ватыканам, але з
прычыны адсутнасці сродкаў не быў выдадзены. Цяпер, па словах беларускага іерарха,
такая магчымасць з’явілася і будзем спадзявацца, што неўзабаве гэтая сапраўды неабходная
кніга выйдзе ў свет.
Мітрапаліт Кандрусевіч прывёў выказванне дапаможнага біскупа
Варшаўскага Пятра Ярэцкага, які адзначыў, што рознага роду канферэнцыі неабходныя,
аднак трэба таксама надаваць увагу і непасрэднаму фармаванню чалавека. «Калі чалавек
не зменіцца, калі не будзе адчуваць патрэбы жыць паводле навучання Касцёла, паводле
маральных прынцыпаў, гэтыя канферэнцыі не прынясуць таго выніку, якія яны павінны
прынесці», — перадаў арцыбіскуп Кандрусевіч думку польскага іерарха.
«Я спадзяюся,
што і ў Беларусі, якая адраджаецца, чалавек хоча ведаць больш пра сацыяльнае навучанне,
што гэтае пленарнае пасяджэнне выпрацуе новыя напрамкі пошуку выйсця са складаных
сітуацый: і з эканамічнага крызісу, і маральнага крызісу, і крызісу сям’і. Выйсце
з іх крыецца ў захаванні маральных каштоўнасцяў», — дадаў беларускі арцыпастыр.