Papa në Meshën për kardinajtë e ipeshkvijtë e vdekur: Zoti nuk i shfaqet njeriut si
dënim, por si mëshirë pa kufi
(04.11.2010 RV)Të jesh i krishterë do të thotë të parapëlqesh gjërat e Zotit,
pa i përbuzur ato njerëzore. Do të thotë edhe të jesh i vetëdijshëm se Zoti nuk sillet
si padron i njeriut, por e do atë me një mëshirë pa kufi. Këto ishin mendimet e Papës
Benedikti XVI në meshën e paradites së sotme, kremtuar në Bazilikën e Shën Pjetrit,
për shpirtin e kardinajve dhe ipeshkvijve të vdekur gjatë këtij viti.
Jehona
e fjalëve të shqiptuara spontanisht dje, në fund të katekizmit në Sallën Pali VI në
Vatikan u ndje e fortë dhe e menjëhershme: çfarë e ndyn shpirtin duhet hedhur, por
pa u larguar nga impenjimet e kësaj bote. Gjatë homelisë, Ati i Shenjtë iu kthye edhe
një herë një koncepti të ngjashëm, duke u nisur nga ftesa e Shën Palit Apostull për
të kërkuar “gjërat atje lart” e jo ato tokësore: “Jeta në Krishtin sjell marrjen
e një vendimi, heqjen dorë plotësisht nga gjithçka që – si peshë e rëndë – e mban
njeriun të lidhur me tokën, duke korruptuar shpirtin e tij. Kërkimi i “gjërave atje
lart” nuk do të thotë që i krishteri të harrojë detyrat e impenjimet tokësore, por
nuk duhet të humbasë në to, si të kishin vlerë përfundimtare. Thirrja për të parë
drejt Qiellit është ftesë për të kuptuar sa relative është çdo gjë e destinuar të
kalojë, përballë atyre vlerave, të cilat mbeten, pavarësisht nga koha”. Papa
iu rikthye këndvështrimit të krishterë mbi vdekjen dhe mbi misterin e Ringjalljes,
mbi faktin se besimtari është shtegtar mbi këtë tokë, si “një i huaj drejt amshimit”,
tha Benedikti XVI. Ati i Shenjtë përmendi emrat e gjashtë kardinajve, që u ndanë këtë
vit nga kjo jetë si edhe shumë ipeshkvij e kryeipeshkvij, barinj të zellshëm, të cilët
me dëshirën për të ndjekur Jezusin, shijuan që kur ishin gjallë, jetën e amshuar të
premtuar nga Krishti: “Shprehja “jetë e amshuar”, në të vërtetë, përcakton dhuratën
hyjnore për njerëzimin: bashkimin me Zotin në këtë botë e plotësimin e tij në botën
e ardhshme. Jetën e amshuar e kuptojmë nga Misteri i Pashkëve të Krishtit e feja është
rruga për ta arritur”. Një nga pjesët qendrore të Ungjillit, vërejti Benedikti
XVI, është shpjegimi, që vetë Jezusi i jep Nikodemit, se sa e madhe është dashuria
e Zotit për botën, aq sa t’i dhurojë Birin e tij të vetëm. Jemi, theksoi Papa, para
një akti vendimtar e përfundimtar, me të cilin Hyji kapërcen pragun e vetmisë sonë
të fundme, kapërcen pragun e vdekjes e zhytet në errësirën e frikës sonë ekstreme: “Është
kjo një pjesë, që e fshin krejtësisht idenë e një Zoti të largët dhe të huaj për rrugën
e njeriut, duke na zbuluar fytyrën e Tij të vërtetë: Ai na dhuroi Birin e tij për
dashuri, për të qenë afër nesh, që ta ndjejmë praninë e Tij, për të na ndihmuar e
për të na mbajtur me dashurinë e Tij, që e gjithë jeta të marrë shpirt nga kjo dashuri
hyjnore… Zoti nuk sillet si padron, por i do njerëzit pa kufi. Nuk e shfaq pushtetin
e Tij të pamasë përmes dënimit, por përmes mëshirës e faljes”. Ta kuptosh këtë,
vazhdoi Papa, do të thotë të hysh në misterin e shëlbimit: Jezusi erdhi për të shpëtuar
e jo për të dënuar. Me Flijimin në Kryq, Ai na zbulon fytyrën e dashurisë së Zotit: “E
pikërisht për hir të besimit në dashurinë e jashtëzakonshme dhuruar në Jezu Krishtin,
ne e dimë se edhe forca më e vogël e dashurisë është më e madhe se forca më e madhe
shkatërruese e mund ta shndërrojë botën. Për hir të këtij besimi ne mund të kemi shpresë
në jetën e amshuar e në ringjalljen e korpit”.