Արամ Ա կաթողիկոս Արքութեան Պատիւ Եւ Տիտղոս Շնորհեց Տիրայր Եւ Նարեկ Սրբազաններուն։
Հայ մշակոյթի ամսուան առիթով, կիրակի, 31 հոկտեմբեր 2010-ին, Անթիլիասի Մայր տաճարին
մէջ մատուցուած պատարագի աւարտին Մեծի Տանն Կիլիկիոյ Արամ Ա կաթողիկոս Հայրապետական կոնդակաւ
Արքութեան պատիւ եւ տիտղոս շնորհեց Մեծի Տանն Կիլիկիոյ կաթողիկոսութեան միաբաններէն,
Մատենադարանապետ Տիրայր եպս Փանոսեանին եւ կաթողիկոսութեան Միջեկեղեցական յարաբերութեանց
բաժանմունքի վարիչ՝ Նարեկ եպս Ալեէմէզեանին։
Արամ Ա կաթողիկոս բարձրօրէն գնահատելով
երկու սրբազան հայրերուն նուիրումն ու ծառայութիւնը, ինչպէս նաեւ հայ գիրքին ու մշակոյթին
նկատմամբ ցուցաբերած նախանձախնդրութիւնը՝ հայ մշակոյթի ամսուան առիթով կատարեց այս շնորհաբաշխումը։
Այս առիթով Արամ Ա կաթողիկոս յիշեցուց ներկայ բազմութեան, թէ Մեծի Տանն Կիլիկիոյ կաթողիկոսութեան
միաբանութիւնը միշտ մօտ եղած է հայ գիրքին ու մշակութային մեր արժէքներուն։