Irak: u zhvilluan salikimet e dy meshtarëve që u vranë bashkë me 56 besimtarë në atentatin
e së dielës në Bagdad.
(02.11.2010 RV)Në Irak, këto janë ditë dhimbjeje dhe turbullimi pas atentatit
të së dielës që i kushtoi jetën 58 vetëve, ndër të cilët fëmijë, dhjetë gra dhe dy
meshtarë. E ndërsa bota e krishterë ende po reflekton mbi terrorin e Al Kaedës dhe
pasojat e tij, sot në Bagdad u zhvilluan salikimet e Atë Tair Sad-Ala Abd-Al dhe të
Atë Vasem Sabeeh Al-kas Butros. Salikimet u zhvilluan në kishën kaldee të Shën
Jozefit, jo larg prej asaj siro-katolike të Zojës Sonë të Shpëtimit ku ndodhi akti
terrorist, një akt ky që mund të ishte shmangur, siç deklaruan sot autoritetet irakiane.
Në fakt gjatë ditëve të kaluara burimet sekrete kishin njoftuar se Al-Kaeda kishte
ndërmend të sulmonte kishat e krishtera. Ndërkaq nga Egjipti, kisha Kopte njoftoi
se dy gratë - të cilat sipas Al-Kaedës janë marrë peng nga të krishterët sepse janë
kthyer në fenë islame, shkak i aktit terrorist kundër të krishterëve në Irak, - nuk
fshihen në asnjë kuvend. Po sot gazeta egjiptiane “El Vatani” njoftoi se dy gratë
që përmenden nga Al-Kaeda, nuk janë marrë peng nga askush, por janë larguar nga familjet
e tyre për shkaqe mosmarrëveshjesh të brendëshme dhe madje nuk janë kthyer aspak në
fenë e islamit, siç pretendojnë burimet e Al-Kaedës. Nga ana tjetër në Irak, autoritetet
mbyllën zyrat e televizionit Al-Bagdadia. Drejtori dhe një nëpunës tjetër akuzohen
për bashkëpunim me terroristët sepse kanë transmetuar kërkesat e tyre kur këta mbanin
peng të krishterët. Ndërsa kisha irakiane ka frikë se mos kjo valë e re dhune do
të shtyjë të krishterë të tjerë të largohen nga Iraku. Sipas të dhënave të ipeshkvijve,
sot në Irak numërohen afro 400 mijë të krishterë në një kohë kur në 2003, para se
të fillonte lufta, ata ishin një milionë gjysëm.