Këto ditë, kur sytë e të krishterëve lartohen nga qielli, për të kundruar Gjithë Shenjtorët,
e jo më pak, ngulen mbi rrasat, nën të cilat prehen të dashurit e vdekur, që nuk
janë më mes nesh, na tërheqin vëmendjen tek ngjarja, që e vënë në provë fenë tonë! Na
kujtojnë se shpesh herë në rrjedhën e historisë, vuajtja e të krishterëve mund të
marrë një nga format e persekutimit, që kërkon besnikëri deri në martirizim. E mendimi
ynë, natyrisht, shkon tek të krishterët e Bagdadit, të vrarë mizorisht në Kishën e
tyre, në sa ishin shtrënguar rreth elterit, për të marrë Bukën e jetës. U flijuan
pikërisht në sa Krishti përsëriste flijimin e tij në Eukaristi, për të gjithë besimtarët.
Gjaku i tyre e Gjaku i Zotit u bënë një, në sa Kisha universale kremtonte solemnitetin
e të Gjithë Shenjtorëve, në përgatitje për të kujtuar, një ditë më pas, të vdekurit.
Nga të vdekur, ata merituan emrin më të ndritur, atë të Shenjtit. Mund të ishim
edhe ne mes tyre. Ç’përgjigje do të jepnim, po të na kërkohej ky gjest ekstrem i dashurisë
për Krishtin? Po të vihej në një provë të tillë besnikëria jonë ndaj Zotit të Kryqëzuar?
Pikërisht kjo besnikëri, që propozon Kisha në këto ditë jo të zakonshme, kur fletët
fluturuese të kalendarit na nxisin të meditojmë për atë, që e shqetëson që në zanafillë
mendjen njerëzore; jetën e përtejvarrit, lumninë e përtej jetës, realiteti qiellor.
E pikërisht dëshira e zjarrtë për t’u bërë një me Zotin, i nxiti martirët irakianë
të Bagdadit t’i afrohen Tabernakullit, në një situatë që nuk premtonte asgjë të mirë.
Shkuan kundër rrymës, për të mos e humbur udhën e drejtë në jetë, udhën që i çoi në
Lumninë e Zotit, pikërisht këto ditë kur bota e krishterë mediton për gjithë Shenjtorët,
besnikë, deri në martirizim!