Thirrje e fuqishme e Papës për Lindjen e Mesme pas atentatit të djeshëm në Bagdad:
në Engjëllin e Tënzot, dhurata e shenjtërisë.
(01.11.2010 RV)Në ditën, që Kisha ua kushton të Gjithë Shenjtorëve, Papa foli
për dhuratën dhe bukurinë e shenjtërisë e të bashkimit me të vdekurit, të cilët do
të kujtohen në Liturgjinë e nesërme. Bëri, më pas, një thirrje të fuqishme për paqe
në Lindjen e Mesme, pasi shprehu dhimbjen për atentatin e shëmtuar të djeshëm në Katedralen
siro-katolike të Bagdadit........
“Shenjtëria,
vulosja e vetvetes me vulën e Krishtit, është qëllimi i jetës së besimtarit të krishterë”.
Kështu Papa kujtoi se solemniteti i të Gjithë Shenjtorëve na fton t’i lartojmë sytë
drejt qiellit e të meditojmë për jetën e përkryer hyjnore, që na pret. Si bij të dashur,
tha Benedikti XVI, marrim edhe hirin për t’i përballuar provat e jetës tokësore. Papa
kujtoi më pas, urinë e etjen e njerëzve për drejtësi, keqkuptimet, persekutimet, por
pa harruar të theksojë se ka edhe gjëra të tjera, për të cilat ia vlen edhe të vuash
e se “...njëkohësisht trashëgojmë që tani, atë që na u premtua në Lumturitë
ungjillore, në të cilat shkëlqen figura e re e botës dhe e njeriut, e përuruar nga
Jezusi”. Amshimi, shpjegoi Benedikti XVI, nuk është thjesht shfletim i
ditëve të kalendarit, që shkon drejt fundit, por diçka që i ngjet çastit të plotësimit
të dëshirave, në të cilin tërësia na rrok e ne rrokim tërësinë e qenies, të së vërtetës,
të dashurisë. Prej këndej, dhurata e bukuria e shenjtërisë është bashkimi me shpirtërat
e lumtur, sepse, nënvizoi Papa, jeta e shenjtorëve nuk është vetëm jetëshkrimi i tyre
tokësor, por edhe vepra, që kryejnë në Zotin, pas vdekjes së tyre. E për vdekjen
Benedikti XVI foli, duke kujtuar Liturgjinë e të vdekurve, që do të kremtohet nesër.
Ndarja nga të dashurit, kujtoi Shenjtëria e Tij, është vërtet e dhimbshme, por kjo
nuk duhet të na bëjë të harrojmë se vdekja e krishterë është pjesë e rrugës, që na
bashkon me Zotin. Nuk duhet të kemi frikë, prandaj, porositi Benedikti XVI, sepse
nuk e këput bashkimin me Krishtin, përkundrazi. E këtë na e kujtojnë si Liturgjia
e 2 nëntorit, ashtu edhe vizitat e përshpirtshme në varrezat, për t’u lutur pranë
varreve të të dashurve, që nuk janë më mes nesh e që urojmë ta kenë mbërrijtur cakun
e lumnueshëm!
Pas Lutjes mariane, Ati i Shenjtë kujtoi atentatin e rëndë,
që ndodhi dje në katedralen siro-katolike të Bagdadit: “Lutem për
viktimat e kësaj dhune, sa pa kuptim, aq të egër, që goditi njerëzit e pambrojtur,
të mbledhur në shtëpinë e Zotit, shtëpi dashurie e pajtimi. I shpreh afërsinë time
të përzemërt bashkësisë së krishterë, të goditur përsëri, dhe u jap zemër barinjve
e besimtarëve të jenë të fortë e të patundur në shpresë”. Më pas, thirrja
për t’i dhënë fund dhunës: “Përballë episodeve mizore të dhunës, që vijojnë
të trondisin popullsinë e Lindjes së Mesme, përsëris thirrjen time të ngutshme për
paqe; ajo është dhuratë e Zotit, por edhe rezultat i përpjekjeve të njerëzve vullnetmirë
e të institucioneve kombëtare e ndërkombëtare. Të gjithë duhet të bashkojnë forcat,
që t’i jepet fund çdo dhune”.
Gjatë përshëndetjeve në gjuhë të ndryshme,
një mendim për aradhet e shenjtorëve: në frëngjisht, inkurajimi për të admiruar turmën
e pafundme të atyre që, pasi kanë shkelur mbi gjurmët e hapave të Zotit, kundrojnë
Lumninë e Tij e ndërmjetësojnë për ne. Në anglisht, ftesa për t’i kundruar ata,
që jetojnë përgjithmonë në praninë e Zotit, Atit tonë, që është në qiell. Në polonisht,
urimi që zemrat të jenë të palëkundura në shenjtëri, përballë Hyjit Atë, në çastin
e ardhjes së Zotit tonë Jezu Krishtit me të gjithë shenjtorët e tij. Në italisht,
përshëndetja e veçantë drejtuar pjesëmarrësve të manifestimit “Vrapi i shenjtorëve”,
organizuar nga salezianët, për të mbështetur projektet e solidaritetit në situata
të vështira, siç janë ato në Haiti e në Pakistan.