Një sinod në shërbim të të gjithëve: editorial i atë Lombardit.
(31.10.2010 RV)“Nuk duhet të heqim kurrë dorë nga paqja. Edhe kur na duket
e largët. Paqja është e mundur! Është urgjente!”. Këtë thirrje të fuqishme bëri të
dielën e kaluar Benedikti XVI, gjatë Meshës përfundimtare të Sinodit të posaçëm për
Lindjen e Mesme, kremtuar në Bazilikën e Vatikanit, në praninë e Etërve sinodalë.
Kësaj ngjarje, ndikimi pozitiv i së cilës do ndjehet për një kohë të gjatë, Atë
Federiko Lombardi i kushton editorialin e tij të fundjavës për ‘Octava Dies”,
e përjavshme informative e Qendrës Televizive të Vatikanit:
“Ç’i kërkon
në mesazhin e tij Sinodi atyre që qeverisin popujt e Lindjes së Mesme? Që të krishterët
“të mund t’i gëzojnë të gjitha të drejtat, si të gjithë nënshtetasit e tjerë, të kenë
lirinë e ndërgjegjes e të kultit, të jenë të lirë në fushën e arsimit e të edukimit
si dhe në përdorimin e mjeteve të komunikimit, sepse janë nënshtetas të vërtetë, të
lindur e të rritur në ato troje, të lidhur ngusht me atdheun e tyre, të gatshëm për
t’i kryer besnikërisht të gjitha detyrat e tyre kombëtare. Ç’thotë Sinodi,
duke iu drejtuar bashkësisë ndërkombëtare? Se “ne e dënojmë dhunën e terrorizmin,
prej ngado që të vijë, dënojmë edhe çdo lloj ekstremizmi fetar. Dënojmë çdo formë
të racizmit, të antisemitizmit, të antikristianizmit e të urrejtjes kundër Islamit
e u bëjmë thirrje të gjitha feve, t’i pranojnë përgjegjësitë e tyre për nxitjen e
dialogut ndërmjet kulturave e qytetërimeve të rajonit tonë e të mbarë botës. Fjalët
e përfaqësuesit hebraik, të atij sunit e atij shiit, u ndoqën me vëmendje të madhe,
me kënaqësi e u duartrokitën nxehtësisht. Anëtarët e Sinodit u shprehën krejt lirisht,
duke paraqitur me ndershmëri e qetësi kuadrin e përgjithshëm të gjendjes së bashkësive
të tyre kishtare. Sigurisht ishte fjala për një asamble me rrënjë të thella në një
tokë të tronditur nga tensione e nga probleme dramatike, por natyra kishtare e kësaj
mbledhjeje të madhe, motivimi fetar, shpirtëror, e ndihmoi të ngrihej në një perspektivë
më të lartë, ta shikonte këtë situatë me sy të frymëzuar nga realizmi i shpresës,
që lind nga feja e jetuar në këtë historinë tonë. Urojmë që të gjithë ta
kuptojnë e ta pranojnë, që Sinodi t’i japë frytet e veta, posaçërisht për Kishën,
por edhe për të gjithë Popujt e Lindjes së Mesme, pikërisht për të gjithë!".