Kajro: nisi takimi ndërfetar në vazhdën e Takimit të Riminit.
(28.10.2010 RV)Fryma e miqësisë
që i jep tonin çdo vit Takimit të Riminit do të karakterizojë edhe takimin dyditor
të Kajros, që u hap sot e mbyllet nesër, ndërmjet të krishterëve koptë dhe myslimanëve.
Takimi i quajtur “Bukuria, hapësira e dialogut ndërmjet kulturave”, është organizuar
nga përfaqësuesit myslimanë të kulturës egjiptiane. Bën pjesë ndër ta edhe prof. i
gjuhës arabe pranë “Amerikan Juniversiti” Uael Faruk, pjesëmarrës edhe në takimet
e Riminit. Mbi arsyet që i shtynë autoritetet e kulturës egjiptiane ta organizojnë
këtë takim, në mikrofonin tonë flet përgjegjësi për Lindjen i organizatës “Bashkim
dhe Çlirim” Dom Ambroxho Pizoni:
Përgjigje: Kanë mbetur të mrekulluar kur kanë
ardhur në Rimini dhe kanë parë edhe anët e tjera të veprimtarive që zhvillon organizata
“Bashkim dhe Çlirim” dhe nga tema e “bukurisë”. Kjo gjë i ka prekur thellësisht fijet
e zemrave të tyre. E zemrën Zoti na e ka dhënë pikërisht për të njohur bukurinë si
vend ku shkelqen e vërteta, sikurse na mëson tradita e krishterë. Kështu që kanë vënë
re se në Takimin e Riminit janë pritur dhe nderuar për atë që janë. E na kanë thënë:
“Kemi nevojë për këtë bukuri, sepse këtu në Takimin e Riminit na pritën, na deshën
dhe na dëgjuan ashtu siç jemi. Prandaj, për këtë përvojë bukurie, për këtë takim të
vërtetë ku mund të lindë edhe dialogu, ka nevojë edhe historia e jonë, qytetërimi
ynë, tradita myslimane në Egjipt.”
Pyetje: Prof. Faruk flet për nevojën e diversitetit
brenda dialogut, në mënyrë që dialogu të jetë autentik dhe se zhdukja e diversitetit
nuk mund të mbështetet...
Përgjigje: Themeli është ky: nuk mund ta takoj atë
tjetrin sepse e kuptoj që ai tjetri nuk është si unë. Pikërisht në këtë polarizim
të pashmangshëm krijohet një ndërgjegjësim i ri për veteveten dhe një njohje e re
e atij tjetrit. Si të them, kjo është pak si kripa që i jep shije jetës, e cila përndryshe
do të ishte kthyer në një rrafsh të mërzitshëm dhe të padurueshëm. Nga takimi me atë
tjetrin buron edhe një njohje e re e vetvetes, dhe këto vite në marrëdhëniet me shumë
nga pjesëmarrësit në Takimin e Riminit, të cilët vijnë nga të gjitha anët e botës,
me kulturë dhe bindje fetare të ndryshme, kemi përsëritur edhe një herë dëshminë për
të vërtetën që jep kjo ngjarje.
Pyetje: Nesër pasdite do të flitet për zemrën
në Takimin e Kajros, për atë gjë që na shtyn të dëshirojmë gjëra të mëdha...
Përgjigje:
Kjo bëhet pikërisht për faktin se ne, por edhe atyre, na u duk se duke i shkuar deri
në fund këtij arsyetimi, pra, mbi natyrën e zemrës dhe të misionit të saj në histori,
është diçka vendimtare. Menduam se është themelore për të krijuar një mundësi tjetër
për takim, akoma më të gjerë, me të gjithë ata që po marrin pjesë në takimin e Kajros.
Edhe për ne, të flasësh për zemrën përbën një sfidë. Do të thotë t’i hapesh një faze
të re të njohjes dhe të misterit që është Krishti, i cili vepron siç po e shohim me
sytë tanë, në një mënyrë krejtësisht të paparashikueshme. Takimi i Kajros nuk është
përgatitur në tavolinë, por ja që po zhvillohet dhe duke u zhvilluar dhe duke iu përgjigjur
nevojës sonë më të thellë për bukurinë e së vërtetës, po na hap një horizont të ri.
Po na bën të jemi më të vërtetë në marrëdhënie me realitetin.