Ватыкан супраць смяротнага пакарання для Тарыка Азіза

Ватыкан выступае за адмену смяротнага пакарання ва ўсім свеце і таму спадзяецца, што смяротны прысуд, вынесены ў Іраку былому віцэ-прэм'еру і кіраўніку іракскай дыпламатыі Тарыку Азізу не будзе выкананы.

Пазіцыя Каталіцкага Касцёла наконт смяротнага пакарання добра вядомая. “Таму мы сапраўды хацелі б, каб прысуд, вынесены Тарыку Азізу, не быў выкананы ", - гаворыцца ў апублікаванай заяве прадстаўніка Ватыкана айца Фэдэрыко Ламбардзі.

Кіраўнік Залі Друку Апостальскай Сталіцы падкрэслівае, што адмена смяротнага прысуду “станоўча адаб’ецца на працэсе прымірэння, аднаўлення супакою і справядлівасці ў Іраку пасля мноства перанесеных ім пакут.

Што тычыцца магчымасці гуманітарнага ўмяшання,Святы Пасад звычайна дзейнічае ў падобных выпадках праз дыпламатычныя каналы, якія мае ў сваім распараджэнні”-, заявіў айцец Ламбардзі.

Каб смяротны прысуд мог уступіць у сілу, ён павінен быць зацверджаны Прэзідэнцкім Саветам Ірака.

Раней Тарыка Азіза, які займаў пасаду міністра замежных спраў Ірака, асудзілі на 22 гадоў пазбаўлення волі за дачыненне да злачынстваў рэжыму Хусэйна.