“Një familje e vetme njerëzore”: Mesazh i Papës për Ditën botërore të Emigrantit dhe
të Refugjatit
(26.10.2010 RV)“Një familje e vetme njerëzore”. U paraqit sot paradite në Sallën
e Shtypit të Vatikanit, mesazhi i Papës për Ditën e ardhshme botërore të Emigrantit
dhe të Refugjatit, që do të kremtohet më 16 janar 2011. Benedikti XVI kërkon të
reflektohet mbi fatin e emigrantëve dhe të refugjatëve në shoqëri gjithnjë e më tepër
shumëetnike e shumëkulturore. Të gjithë kanë të drejtë të përdorin të mirat e kësaj
toke, nënvizon Ati i Shenjtë. Nga njëra anë, Kisha u njeh njerëzve të drejtën e emigrimit
në kërkim të një jete më të mirë, por, nga ana tjetër, pranon edhe se shtetet mikpritëse
duhet të mbrojnë kufijtë e tyre, të përcaktojnë flukset e emigracionit, gjithnjë duke
respektuar dinjitetin e çdo njeriu. Edhe emigrantët, thekson Papa, e kanë për
detyrë të integrohen në vendin pritës, duke respektuar ligjet dhe identitetin e tij
kombëtar. Në veçanti, shton Benedikti XVI, duhet treguar kujdes për gjendjen e refugjatëve
dhe të emigrantëve, që detyrohen të largohen me forcë nga vendet e tyre, për shkak
të dhunës e persekutimit. Respektimi i të drejtave të tyre, për të cilat bashkësia
ndërkombëtare është impenjuar zyrtarisht; ndihma për të gjetur një vend ku të jetojnë
në paqe e siguri, ku të punojnë e ku të ushtrojnë fenë e tyre – vëren Papa – është
kusht për bashkëjetesën paqësore e për kontributin në ndërtimin e shoqërisë pritëse. Në
fund, Benedikti XVI bën thirrje që të tregohet kujdes i veçantë për studentët, që
shkojnë nëpër universitete jashtë vendit. Ata janë krerët e ardhshëm të atdheut të
tyre, ura kulturore dhe ekonomike ndërmjet kombeve, gjë që kontribuon në mënyrë të
veçantë në formimin e “një familjeje të vetme njerëzore”.