Filloi dje Festivali IX ndërkombëtar i muzikës dhe i artit kishtar.
(24.10.2010 RV)Filloi dje Festivali IX ndërkombëtar i muzikës dhe i artit kishtar,
kushtuar Shenjtërisë së Tij, Benediktit XVI, në pesëvjetorin e papnisë. Veprimtaritë
nisën dje, në orën 17.00, në Bazilikën e Shën Pjetrit, në Vatikan, me Meshën solemne,
kryesuar nga kardinali Anxhelo Komastri, Kryeprift i Bazilikës e Mëkëmbës i përgjithshëm
i Shenjtërisë së tij për Qytetin e Vatikanit. Më pas u dha një koncert, interpretuar
nga Kori i Katedrales së Shën Patrikut të Nju Jorkut, orkestra e Katedrales së Maincit
dhe nga Kori i dhomës “Belkanto”. Koncert tjetër, ai që u dha në Kishën e Shën
Injacit (sot, 24 tetor, ora 17.00), me pjesëmarrjen e korit të Katedrales së Shën
Patrikut të Nju Jorkut, i cili ekzekutoi muzikë nga Mozart, Brukner e Palestrina. Po
sot, 24 tetor, në orën 21.00, në Bazilikën e Shën Gjonit, në Lateran, u dha koncerti
i drejtuar nga Mathias Breitschaft. Ansambli ekzekutoi muzikë të zgjedhur nga G.
Gabrieli, Froberger, Richter, Wagner, R. Strauss, Schönberger e Hazell. Kulmi do
të arrijë nesër, e hënë, 25 tetor, në Bazilikën e Shën Palit jashtë Mureve të Romës,
me Koncertin e Filarmonisë së Vjenës. Në program, kompozime të zgjedhura nga Mozart
e Hajdn. Manifestimi muzikor do të përfundojë në Bazilikën Papnore të Shën Marisë
së Madhe, të martën, 26 tetor, ora 21.00, me ekzekutimin e veprave të Mendlsonit e
të Gunosë, interpretuar nga Bach-Chor i Siegen, nga Filarmonia e Vestfalisë jugore
dhe nga Orkestra Federale Renani veriore-Vestfali.