Përurohet në Tiranë “Rruga e Mijëvjeçarit të Paqës” kushtuar së Lumes Nënë Tereze.

(19.10.2010 RV)Sot paradite në Tiranë presidenti i Republikës Bamir Topi, kryeministri Sali Berisha dhe kryetari i Bashkisë së Tiranës Edi Rama, përuruan fillimin e ndërtimit të një rruge të re në Tiranë, quajtur “Rruga e Mijëvjeçarit të Paqës”. Kjo rrugë e re e kryeqyteti i kushtohet së Lumes Nënë Terezë, e cila u pat shpallur e Lume pikërisht si sot shtatë vjet më parë nga Papa Gjon Pali II.
Në fjalën e vet presidenti Topi vuri në dukje se Nënë Tereza, Gonxhe Bojaxhiu, me jetën dhe me veprat e veta ndërtoi një rrugë që shërben si bazë e qytetërimit tonë dhe e dëshirës së vazhdueshme të popujve – atë të paqës. Prandaj rrugën e saj që simbolikisht mund ta quajmë të paqës, populli shqiptar deshi ta kontretizojë me një rrugë që me të vërtetë është emërtuar si “Rruga e Paqës”.
Më tej në fjalën e tij presidenti Topi theksoi se çdo shqiptar e ka për detyrë të zbatojë doktrinën e Nënë Terezës, atë të dashurisë dhe të paqës.
Rruga është e gjatë 2.7 km dhe zë fill tek liqeni artificial në Tiranë. Anash saj do të vendos pllaka me mbishkrime nga 28 njerëz të shquar të të gjithë botës.