Paqja dhe Lindja e Mesme, një binom që nuk duhet të dështojë
(19.10.2010 RV)Punimet e Sinodit
të ipeshkvijve për Lindjen e Mesme u zhvilluan sot me dyer të mbyllura. Po përgatiten
Porpozimet përfundimtare. Paradite, një delegacion i Sinodit mori pjesë në konferencën
me titull “Lindja e Mesme. Dëshmia e krishterë në shërbim të paqes”, organizuar nga
komuna e Romës, sëbashku me lëvizjen “Bashkim e Çlirim” dhe me Radio Vatikanin. Paqja
në Lindjen e Mesme është shpresë për gjithë popujt e botës. Ky ishte boshti i diskutimeve
në konferencë sëbashku me rëndësinë e pranisë së krishterë në Tokën Shenjte. Të dëgjojmë
kryetarin e bashkisë së Romës, Xhani Alemano: “Vlerat e krishterimit mund të
jenë pa dyshim ilaçi më i mirë që në zgjidhjen e konfliktit, në arritjen e paqes e
të drejtësisë të mos mbetet barra e tensioneve, zemërimeve, inateve, armiqësisë, të
cilat lindin nga urrejtja e grumbulluar për vite me radhë”. I bëri jehonë
Sekretari i Përgjithshëm i Sinodit, imzot Nikola Eteroviç, që kujtoi se paqja është
dhuratë e Zotit e se çdo anëtar i Kishës është i thirrur të kontribuojë në arritjen
e saj: “Kjo thirrje ka edhe një përmasë të rëndësishme shoqërore, që mund ta
këpusë rrethin vicioz të dhunës, të hakmarrjes e të urrejtjes si edhe të përgatisë
zemrat për kërkimin e paqes së vërtetë, në pajtim e në drejtësi”. Vazhdoi
drejtori i përgjithshëm i radios sonë dhe zëdhënësi i Vatikanit, atë Federiko Lombardi,
i cili vuri në dukje rolin thelbësor të mas mediave, që të krishterët e Lindjes së
Mesme të përceptojnë solidaritetin e bashkësisë ndërkombëtare, si në nivelin shoqëror,
ashtu edhe në atë politik. Atë Lombardi nënvizoi kërkesën më të madhe, që ndjehet
në Sinod: “Solidarizimi në reflektimin mbi domethënien e vërtetë, mbi vendin
e vërtetë që zë sot, në Lindjen e Mesme e në të gjitha vendet e botës, liria fetare,
liria e ndërgjegjes, e drejta e plotë për të ndërtuar bashkësitë shoqërore e politike,
secili në vendin ku jeton. Thellimi i këtyre temave në mënyrë premtuese për të ardhmen,
pikërisht për t’i përhapur e për t’i bërë të gjithë të vetëdijshëm, për të mirën e
të krishterëve në Lindjen e Mesme”. Dramatike, ndërkaq, faqja e paraqitur
nga Ministri i jashtëm italian, Franko Fratini. Ndër 100 viktima të intolerancës fetare
në botë, deklaroi ai, 75 janë të krishterë. Gjendja është alarmuese: “Kristianofobia
sot është rrezik në rritje e shumë më konkrete se më parë. Në shumë kontekste, bashkësitë
e krishtera jetojnë në kushte izolimi dhe përjashtimi, megjithëse gjatë historisë,
kanë qenë qendra të rrezatimit të krishterimit, edhe shumë më parë se të vinte islamizmi”. Ministri
Fratini kujtoi edhe propozimin për të paraqitur në OKB, një rezolutë për mbrojtjen
e pakicave dhe të lirive fetare. Në këtë kontekst, sfida e vërtetë e krishterimit
është të tregojë rëndësinë e tij antropologjike. Të dëgjojmë Don Juliàn Carròn, president
i Lëvizjes “Bashkim e Çlirim”: “Në Lindjen e Mesme të martirizuar, dobësisë
vetjake të çdo njeriu i shtohen edhe vuajtjejet objektive e kërcënimi kundër të drejtave
themelore, mënjanimi e mbytja e lirive. Pikërisht aty, krishterimi duhet të tregojë
të vërtetën e tij, aftësinë e tij për ta ngritur në këmbë njeriun e për ta shpëtuar”. Lindja
e Mesme është një paradoks, përfundoi Rojtari i Tokës Shenjte, atë Pierbatista Picabala.
Pikërisht aty ku kanë lindur, të krishterët janë më të paktë në numër. Megjithatë,
realiteti i tyre i ka rrënjët e thella e ata vetë janë shumë aktivë: “Nuk mund
të thuhet se nuk ekziston dëshmia e krishterë. Ekzistojnë veprat, aktivitetet e të
krishterëve. Kishat e krishtera nuk mbyllen në vetvete, kanë një gjallëri të jashtëzakonshme
e prania e krishterë – veprat, aktiviteti i Kishës – përmes shkollave, spitaleve,
universiteteve, shkon shumë përtej atij 2,5 përqindëshit të popullsisë, që është e
krishterë”. Binomi Paqe e Lindje e Mesme kujtohet edhe në orën 21.00, në Auditorium
e rrugës së Pajtimit, pranë Radio Vatikanit, ku mbahet koncerti “Effatà. Artistët
në dialog me Lindjen e Mesme”.