Benedikti XVI i kërkon ambasadorit të ri të Kolumbisë që vendi të respektojë ligjin
natyror
(18.10.2010 RV)Të respektohet ligji natyror: këtë i kërkoi Benedikti XVI ambasadorit
të ri të Kolumbisë, Sezar Mauricio Velaskez Osa, të cilin e priti sot paradite në
audiencë për paraqitjen e Letrave Kredenciale. “Kisha në Kolumbi nuk kërkon asnjë
privilegj”, sqaroi Papa, pavarësisht se prej vitesh ajo merret me edukimin e brezit
të ri, me kujdesin për të sëmurët e të moshuarit, punon për respektimin e popujve
indigjenë dhe të traditave të tyre të ligjshme, për çrrënjosjen e varfërisë, të trafikut
të drogës dhe të korrupsionit, kujdeset për të burgosurit, të braktisurit, emigrantët
e punëtorët si edhe ndihmon familjet në nevojë. Duke kujtuar se këtë vit bie 165-vjetori
i marrëdhënieve ndërmjet Selisë së Shenjtë dhe Kolumbisë, Papa e bëri të qartë se
kusht për një bashkëpunim të frytshëm është respektimi i ligjit natyror nga ana e
autoriteteve për mbrojtjen e jetës dhe të dinjitetit njerëzor, për zhvillimin e familjes
së bazuar mbi martesën dhe të së drejtës së anëtarëve të saj për të marrë edukimin
që dëshirojnë.