Benedikti XVI ia kushtoi mistikes Anxhela Folinjo katekizmin e audiencës së përgjithshme.
(13.10.2010 RV)Sot, gjatë katekizmit të audiencës së përgjithshme, mbajtur
në Sheshin e Shën Pjetrit në Vatikan, Papa Racinger i ftoi 40 mijë besimtarët e pranishëm
t’i ndjekin me vëmendje sinjalet e Zotit. Zoti ka mijëra mënyra për t’i folur shpirtit
të secilit nga ne; na drejton mijëra sinjale, për të na i prekur zemrat. Ta lusim,
prandaj, të na ndihmojë për ta përqendruar vëmendjen tek prania e tij në jetën tonë.
Sot të gjithë rrezikohemi të jetojmë sikur të mos kishte Zot, shtoi Papa, i cili
vuri në qendër të katekizmit, të Lumen Anxhela da Folinjo, mistike e madhe mesjetare,
që jetoi në shekullin XIII. Anxhela, shpjegoi Ati i Shenjtë, në fillim ishte larg
Hyjit Atë e Jezu Krishtit. Por më pas u njoh me figurën e Shën Françeskut, që ia zgjoi
shpirtin e përgjumur, ia hapi sytë, për të parë të Kryqëzuarin e për ta ndjekur në
rrugën e Kalvarit, drejt Hyjit Atë. “Askush nuk duhet të justifikohet se nuk mund
ta njohë Zotin; gjithkush mund ta njohë e mund ta dojë Atë!”, shkruan Shenjtorja.
Në rrugën shpirtërore të Anxhelës, kalimi nga kthimi në rrugën e Zotit, tek përvoja
mistike, nga çka mund të shprehet, tek e pashprehshmja, arrihet falë lidhjes së ngushtë
me të Kryqëzuarin, i cili bëhet mësuesi i saj i përsosurisë. Kështu, pra, e nis rrugën
e re shpirtërore. Hap pas hapi. Reflektim pas reflektimi. Vegim pas vegimi: “Anxhela
da Folinjo e paraqet të jetuarit mistik, pa e vrarë mendjen fare, sepse ndriçimet
hyjnore i komunikohen shpirtit të saj krejt papritmas. E ka të vështirë ta shprehë
përvojën e saj mistike. Vështirë, të kuptohet prej të tjerëve. Është në një gjendje,
që tregon qartë se Mësuesi i vetëm e i vërtetë, Jezusi, jeton në zemrën e çdo besimtari
e dëshiron ta pushtojë plotësisht”. Në të vërtetë, rruga e Anxhelës është
kapitëse. Gjatë fazës së parë, shpjegoi Papa, ajo nuk beson se Zoti e do. I vjen turp,
kur kujton mëkatet e veta. Tmerrohet, kur mendon se e pret dënimi i amshuar: “Kjo
frikë nga ferri i përgjigjet tipit të fesë, që kishte Anxhela në çastin e kthimit
të saj; një fe ende e varfër, pa shumë dashuri hyjnore. E ndjen se duhet t’i dhurojë
diçka Zotit për pendesë të mëkateve të veta, por dalëngadalë kupton edhe se nuk ka
asgjë për t’i dhuruar, madje se është asgjë para Tij”. Megjithëse bën një
rrëfim të mirë, në shpirtin e Anxhelës, vijoi Benedikti XVI, zhvillohet një betejë
e vërtetë: e ndjen se Zoti e ka falur, por edhe se në shpirtin e saj nuk janë zhdukur
ende gjurmët e mëkatit; se është e lirë nga e kaluara, por edhe e kushtëzuar prej
saj; se i janë zgjidhur leqet e fajit, por edhe se ka akoma nevojë për pendesë. Duhet
të bëjë edhe një hap, përpara se të arrijë tek pjekuria shpirtërore, përmes së cilës,
pohoi Papa, ndjesa e Zotit e pushton plotësisht shpirtin e saj. Është dhurata më e
madhe, falas, që i bën Ati qiellor. E ky hap, është kuptimi i fljimit të Jezusit: “Çka
do ta shpëtojë nga ‘padenjësia’ e nga ‘ferri i merituar’, nuk do të jetë bashkimi
i saj me Zotin e zbulimi i së vërtetës, por Jezusi i kryqëzuar, kryqëzimi i Tij për
të, dashuria e Tij. Kundron kryesisht Krishtin e kryqëzuar, sepse në këtë vegim shikon
të realizuar drejtpeshimin e përkryer: mbërthyer mbi kryq është njeriu-Zot, në aktin
më të lartë të mundimit, njëkohësisht edhe akti më i lartë i dashurisë”. E
gjithë përvoja mistike e Shenjtores s’është tjetër, veçse përpjekje për t’i përngjarë
përsosurisht Zotit, përmes spastrimit e shndërrimeve gjithnjë më të thella e më rrënjësore.
Për ta realizuar këtë dëshirë, ajo është gati të dhurojë gjithë vetveten, shpirt e
korp, pa marrë parasysh asnjë dhimbje, asnjë vështirësi. Nuk ia kursen vetes pendesat
e trazirat, nga fillimi deri në fund. Dëshiron vetëm një gjë: të vdesë duke mbartur
në trup të gjitha dhimbjet, që provoi Zoti-njeri i mbërthyer mbi kryq, për t’u shndërruar
kështu, plotësisht, në Të. Ky njëjtësim, shpjegoi Benedikti XVI, do të thotë edhe
të jetosh gjithçka që jetoi Jezusi: varfërinë, përbuzjen, poshtërimin, dhimbjen. Sepse
drejtpeshimi ndërmjet dashurisë e dhimbjes është krejt i paqëndrueshëm: mund të kalohet
shpejt nga dhimbja, në dashuri e nga dashuria, në dhimbje. Binom, ky, që e provoi
Krishti në Kryq e, pas tij, të gjithë ata, të cilët e marrin kryqin mbi supe e ecin,
prej shekujsh, me vetëdije të plotë, në udhën e Kalvarit. Është kjo udha që të çon
nga Kryqi, tek Dashuria, tek Zoti. Prandaj, kujtoi Papa, e gjithë përvoja e saj mistike
na çon tek përfundmi se vetëm me Zotin jeta bëhet e vërtetë. E sot, me shembullin
e saj, na kujton se duhet t’ia kushtojmë gjithë vëmendjen pranisë së Zotit, për të
kuptuar kështu cila është rruga që duhet të përshkojmë, rruga e Zotit e me Zotin.
Ta lusim, prandaj, Hyjin, nënvizoi Papa, që të na bëjë ta ndjejmë praninë e tij në
shpirt, të na dëshmojë se është, se na njeh, se na do.
Ndërmjet përshëndetjeve
të Papës në gjuhë të ndryshme, nënvizojmë atë në gjuhën hungareze, me të cilën Benedikti
XVI kujtoi banorët e Kolontarit, fshatit të dëmtuar, më 4 tetorin e kaluar, nga një
fatkeqësi e rëndë e natyrës. Lutem, tha Papa, për njerëzit, që u detyruan të largohen
nga shtëpitë e tyre, që u dëmtuan nga balta helmuese, posaçërisht, për ata që humbën
jetën. Nuk mungoi edhe ftesa, në gjuhën polake, drejtuar besimtarëve, që të luten
për Sinodin e Kishës kushtuar Lindjes së Mesme, në zhvillim e sipër, këto ditë, në
Vatikan. Përshëndetjen e fundit Ati i Shenjtë ua drejtoi, si zakonisht, të rinjve,
të sëmurëve e të sapomartuarve, duke kërkuar për ta ndërmjetësimin e Zojës së Fatimës,
që u duk për herë të fundit pikërisht më 13 tetor 1917.