Арцыбіскуп Фізікелла: мы не можам быць абыякавымі адносна аддалення вернікаў ад Касцёла
“Мы не можам быць
абыякавымі ў абліччы аддалення вернікаў ад Касцёла”,- сказаў падчас прэс-канферэнцыі
арцыбіскуп Фісікелла, прадстаўляючы новую дыкастэрыю - Папскую раду па садзейнічанні
новай евангелізацыі, якую ўзначальвае.
На думку іерарха важна тое, каб
сцверджанне “новая евангелізацыя” не гучала абстрактна. Трэба яго напоўніць тэалагічным
і душпастырскім зместам, усё багацце якога можна знайсці ў навучанні Папаў апошніх
дзесяцігоддзяў.
Арцыбіскуп Фізікелла выказаў перакананне, што новай дыкастэрыі
не пагражае бюракратызацыя, таму што Бэнэдыкт ХVI не бюракрат, а чалавек, які прапаведуе.
Ён валодае глыбокай тэалагічнай пранікнёнасцю, адкрывае прастору, каб заангажаваць
Касцёл у канкрэтную місію. Арцыбіскуп Фізікелла адзначыў, што таксама і ён сам не
ёсць бюракратам. У стварэнні новай дыкастэрыі бачыць, у асноўным, пастырскі клопат
Святога Айца. “Ва ўмовах існуючых выклікаў усе веруючыя пакліканыя да паслядоўнага
сведчання сваёй веры, там дзе яны працуюць - у палітычным, сацыяльным, культурным
і навуковым жыцці”- сказаў старшыня Папскай рады па садзейнічанні новай евангелізацыі.