E drejta e BE-së dhe statusi i konfesioneve fetare theksohet gjatë një takimi pranë
Qendrës së Studimeve për entet kishtare, në Romë.
(11.10.2010 RV)“E drejta e BE-së dhe statusi i konfesioneve fetare” ishte tema
e takimit, organizuar në Romë nga Cesen (Qendra e Studimeve për entet kishtare).
I pranishëm, Vëzhguesi i përhershëm i Selisë së Shenjtë pranë Këshillit të Evropës,
imzot Aldo Xhordano, si dhe shumë referues të tjerë. Ndërmjet tyre, sekretari i përgjithshëm
i Comece-s (Komisionit të Episkopateve të Bashkimit Evropian), imzot Piotr Mazhurkieviç.
Në intervistën, dhënë me këtë rast Radio Vatikanit, flet për perspektivat e reja që
hapen, falë nenit 17 të Traktatit të Lisbonës, me të cilin Bashkimi Evropian reformoi
bazat kushtetuese të institucioneve. Ky nen ka të bëjë me marrëdhëniet ndërmjet Bashkimit
Evropian e Kishave: Përgjigje: - Në nivelin juridik, Traktati
i Lisbonës dhe neni 17 e ndryshuan situatën tonë. Nga njëra anë, para Traktatit të
Lisbonës, ne kishim me institucionet evropiane një dialog të tipit informal. Ishte
një praktikë, rezultatet e së cilës u arritën pas një a dy vjetësh. Mund të them se
për institucionet u hap rruga e lidhjeve me ne në mënyrë publike. E kjo është një
gjë e re. Me sa duket, gjatë këtij muaji do të kemi takime me përfaqësuesit e institucioneve
të ndryshme. Do të flasim e do të reflektojmë së bashku për nenin 17, për detyrimet
që kanë institucionet e për strukturat, që duhet të merren me këtë dialog. Dy janë
vërejtjet më të rëndësishme mbi këtë nen. Së pari, Bashkimi Evropian nuk ka kompetenca
mbi fenë e as mbi statusin e Kishave në vendet anëtare. Fituam garancinë se Bashkimi
Evropian, në të ardhmen, nuk do të marrë asnjë nismë për harmonizimin e kësaj së drejte,
të kësaj gjendjeje shumë të ndryshme e të kësaj situate juridike të Kishave evropiane.
Së dyti, institucionet janë të detyruara të dialogojnë me Kishat, e në këtë çast flitet
shumë për dialog, për shkëmbime opinionesh, për këndvështrimet e për idetë. Veç
perspektivave, që hap Traktati i Lisbonës, është tejet interesante çështja e të drejtave
të reja, ose atyre, që pandehen si të tilla e që mund të afirmohen, pranë të drejtave,
të njohura nga Konventa e të drejtave të njeriut, e cila më 3 nëntorin e ardhshëm
mbush 60 vjet. Për këtë argument, të dëgjojmë profesoreshën e Universitetit të
Milanos, Marta Kartabia:
Përgjigje: - E veçanta e kohës
sonë është se këtyre kërkesave për rregullimin juridik, shpesh u jepet përgjigje
me termat e të drejtave individuale, të drejtave të reja individuale, që nuk krijohen
nga hiçi, por rrjedhin nga disa të drejta të shkruara, ekzistuese, përmes evolucionit
të interpretimeve ose krijimit të të drejtave të reja.
Pyetje: - Pikërisht
këto ditë, Këshilli i Evropës hodhi poshtë një rezolutë mbi të drejtën e kundërshtimit
për arsye të ndërgjegjes, ose më mirë të themi, një rezolutë përmes së cilës bëheshin
përpjekje për të minuar të drejtën e kundërshtimit për arsye të ndërgjegjes, duke
çuar përpara instancën e së drejtës për abort e, si pasojë, edhe detyrën e mjekëve
për t’i ndihmuar gratë, që duan të abortojnë. Vërehet një farë prirjeje për t’i rishikuar
ato, që njihen si vlera themelore e, sidomos, ndoshta, për të krijuar të drejta të
reja, që mund të mos e kenë më bazën e njohur nga Konventa evropiane e të drejtave
të njeriut, sepse në këtë rast, e drejta për të abortuar nuk njihet. Ekziston e drejta
për jetën; e ligjshmëritë kombëtare e njohin këtë të drejtë. Cila është, në këtë rast,
sfida?
Përgjigje: - Problemi serioz është se këto të drejta
të reja nuk hyjnë përmes reflektimit të përgjithshëm mbi ndryshimet që ka pësuar shoqëria
jonë, e prej këndej, edhe përshtatjes së dokumenteve të shkruara në gjysmën e shekullit
të kaluar, si Konventa, me kushtet e reja, por janë të drejta që shtohen nga ana e
organizmave ndërkombëtare me rrugën e ligjshmërisë, ose përmes këtyre rezolutave.
Duken të drejta të reja- e nuk flitet për të drejtën e abortit. Por duhet pasur parasysh
se shpesh ndryshon vetëm gjuha. Nuk flitet për abortin, por për shëndetin riprodhues,
gjë që krijon shumë dyshime. Në se ne shikojmë vetëm problemin e ndërprerjes së shtatzanisë,
çdo lloj kundërshtimi për shkak të ndërgjegjes, duket sikur mund të pajtohet me kërkesën
e mbrojtjes së jetës.
Pyetje: - Për fat të mirë, në këtë rast u
hodh poshtë...
Përgjigje: - Në këtë rast e mora edhe unë lajmin,
që më befasoi kënaqshëm, sepse në një farë mënyre prirja e debatit po shkonte në drejtim
të kundërt.