Kurorë kremtimesh kushtuar Virgjrës Mari, Nënës Hyjnore, Zojës Rruzare në bashkësinë
Kishtare në Bishtazhin të Gjakovës në Kosovë, ku si çdo herë, edhe si vjet Mesha e
festës së Zojës Rruzare më 7 tetor është e veçantë me një pjesëmarrje të jashtëzakonshme
të besimtarëve nga të gjitha viset e Venit. Kësaj radhe Meshën solemne e kryeson
françeskani Atë Anton Ndua ofm gvardjan i Etërve Françeskanë të Gjakovës e famullitar
i Kishës së shën Pjetrit e Palit të këtij qyteti, në bashkë kremtim me don Rrok Gjonlleshaj,
famullitarin e Bishtazhinit e me meshtarë e rregulltarë tjerë. Besimtarët e kësaj
bashkësie janë përgatitur për kremtimin e Pajtores Qiellore me një treditësh shpirtëror
udhëhequr nga don Prenk Lazri e don Dominik Qerimi. Festa e Zojës Rruzare në bashkësinë
Kishtare të Bishtazhinit është një kremtim shpirtëror vërtet i fortë e prekës, me
një pjesëmarrje të madhe e të thellë shpirtërore të besimtarëve dhe një takim vëllazëror
mes bijve të kësaj Kishe famullitare e të besimtarëve të trevave kosovare. Edhe sot
rreth elterit të Zojës rruzare u mblodhën me mijëra e mijëra besimtarë nga të katër
anët e Vendit. Të kujtojmë se lutja Mariane e Rruzares Shenjte të çon drejtpërdrejtë
te Jezusi. Shqiptimi i uratës së Rruzares është lutje bisedë me Zojën e Bekuar mbi
të Birin e saj e shpëtimtarin tonë, Jezu Krishtin. E në sa bisedojmëme Nënën
e Krishtit, e ndjejmë nevojën të lidhemi e të bashkohemi me vetë Jezusin. Ata që i
luten Marisë, e ndjejnë menjëherë se sytë e tyre nuk mund të ndalohen vetëm në fytyrën
e Nënës, sepse Nëna lidhet ngushtë me të Birin, Jezu Krishtin e kështu duke e lutur
Rruzaren, ne vihemi në kontakt me Zojën e Bekuar e me Shëlbuesin e botës, Jezu Krishtin. Më
tepër mbi kremtimin e sotëm të festës së Zojës Rruzare në fshatin Bishtazhin, ta
dëgjojmë famullitarin e kësaj bashkësie kishtare, don Rrok Gjonlleshaj në mikrofonin
e Radio Vatikanit.........