«У цяжкія часы крызісу
і канфліктаў, якія абвастрае глабалізацыя, рэлігіі павінны выконваць асаблівае пакліканне,
каб служыць справе супакою і суіснавання», — піша Дзяржаўны сакратар Яго Святасці
кардынал Тарчызіо Бэртонэ ад імя Бэнэдыкта ХVI у пасланні на Міжнародную малітоўную
сустрэчу за мір, якая праходзіць у Барселоне. Яе арганізавала італьянская супольнасць
святога Ідзія.
Па словах кардынала, «усе народы, калі хочуць жыць як сапраўдная
супольнасць братоў і сясцёр, павінны стаць на супольны фундамент духоўных і этычных
каштоўнасцяў». «Прызнаючы Бога крыніцай існавання чалавека, рэлігіі дапамагаюць усяму
чалавецтву падтрымліваць годнасць кожнай чалавечай асобы», — дадае іерарх.
«З
іншага боку, — чытаем у пасланні, — справа міру патрабуе ўдзелу кожнага веруючага.
Гэтаму павінна служыць малітва, якая з’яўляецца ўрокам мовы супакою, умацоўвае яго
Божы пасеў у чалавечых сэрцах і пераадольвае расавыя, культурныя і рэлігійныя падзелы.
Няхай малітва дае сілу для распачацця шляхоў дыялога, які ў канчатковым выніку знішчыць
непаразуменні і падзелы і дазволіць нам як братам і членам гэтай чалавечай сям’і працягваць
будаваць „гарманічнае суіснаванне“».
Ініцыятыва кангрэсаў «Людзі і рэлігіі»
нарадзілася пасля Міжрэлігійнай сустрэчы ў Асізі ў 1986 годзе, якая была склікана
Янам Паўлам ІІ.
У сёлетняй сустрэчы ў Барселоне ўдзельнічае каля 3 тысяч асоб.
Прысутнічае таксама дэлегацыя з Беларусі, якую ўзначальвае Мітрапаліт Мінскі і Слуцкі
Філарэт.