Papa ipeshkvijve të Brazilit: Kisha nuk është në garë me përvoja të tjera feje, detyra
e saj e vetme është të shpallë Ungjillin
(04.10.2010 RV)Të rizbulohet përgjegjësia e thellë e çdo të pagëzuari në shpalljen
e Ungjillit, në vend që të kufizohemi vetëm në studimin e metodave të reja për ta
bërë sa më “tërheqës” mesazhin e Krishtit. Këtë u tha sot Benedikti XVI ipeshkvijve
të Brazilit, të cilët i priti në Vatikan, gjatë vizitës së tyre ad Limina. Një vështrim i mprehtë
mbi problematikat më aktuale të ungjillëzimit, në zemër të Amazonës, në një territor
prej 2 milion km katrore. Nëse njerëzit mund të shëlbohen përmes rrugëve të tjera,
falë mëshirës së Zotit, u shpjegoi Papa ipeshkvijve, nuk është e mundur të shëlbohemi,
nëse për shkak të neglizhencës, të frikës, të turpit apo të ndjekjes së ideve të rreme,
u pengojmë atyre shpalljen e Ungjillit: “Nganjëherë ndodhemi para kësaj kundërshtie:
imponimi i së vërtetës, edhe nëse është e vërteta e Ungjillit, imponimi i rrugës,
edhe nëse është rruga e shpëtimit, nuk është tjetër veçse dhunim i lirisë fetare.
Me kënaqësi përmend fjalët e drejta të Papës Pali VI: ‘Do të ishte sigurisht gabim
t’i imponohet diçka ndërgjegjes së vëllezërve tanë. Por nëse kësaj ndërgjegjeje i
propozohet e vërteta e Ungjillit dhe shëlbimi i Jezu Krishtit krejt qartë e duke respektuar
lirinë e zgjedhjes…kjo nuk është atentat kundër lirisë fetare, por është homazh, që
i bëhet asaj”. Si bëhet ky ungjillëzim, që nuk imponohet, e cilët janë njerëzit,
që i përgjigjen kësaj sfide? Papa, duke folur për këtë mision, dha një përgjigje të
vlefshme për të gjitha ato vende, ku duhet përhapur Fjala e Krishtit: “Sfidat
e kontekstit aktual mund të sjellin një vizion të reduktuar të konceptit të misionit.
Ai nuk mund të kufizohet në një kërkim të thjeshtë të teknikave e mënyrave të reja
për ta bërë Kishën më tërheqëse, në gjendje të fitojë garën me grupe të tjera fetare,
apo me ideologjitë relativiste. Kisha nuk funksionon për vetveten: është në shërbim
të Jezu Krishtit, ekziston për ta bërë Lajmin e Mirë të afërt me të gjithë njerëzit”. Misionit,
përfundoi Benedikti XVI, nuk i mungojnë forma të jashtme për t’u paraqitur. Duhet
të kujtojmë se ai ushqehet nga një burim më i thellë, që është Eukaristia.