Editorial i atë Federiko Lombardit: “Kundër dënimit me vdekje”
Kohët e fundit është folur shumë për dënimin me vdekje, si për rastin e dënimit të
Sakines, gruas iraniane të akuzuar për tradhëti bashkëshortore, ashtu edhe për rastin
e gruas amerikane, Tereza Ljuis, që u ekzekutua për arkitektimin e vrasjes së të shoqit
e thjeshtrit, pavarësisht se u vërtetua se ishte e sëmurë mendërisht. Në një editorial
plot pathos, zëdhënësi i Vatikanit, atë Federiko Lombardi e ngre zërin kundër dënimit
me vdekje, që i privon njerëzit nga jeta, pa u lënë atyre mundësi të kthejnë rrugë.
Ta dëgjojmë: “Jam kundër dënimit me vdekje. Nuk e dua as në Kinë,
as në Iran, as në Shtetet e Bashkuara të Amerikës, as në Indi, as në Indonezi, as
në Arabinë Saudite, në asnjë vend të botës. Nuk e dua as me vrasje me gurë,
as me pushkatim, as me prerje koke, as me varje, as me rrymë elektrike, as me një
gjilpërë vdekjeprurëse. Nuk e dua as të dhimbshme, as pa dhimbje. Nuk e dua as në
publik e as fshehtas. Nuk e dua as për gratë, as për burrat; as për personat
me të meta fizike, as për të shëndoshët. Nuk e dua as për civilët, as për
ushtarakët; nuk e dua as në paqe e as në luftë. Nuk e dua për atë që mund
të jetë i pafajshëm, por nuk e dua edhe për fajtorët. Nuk e dua për homoseksualët.
Nuk e dua për ato që tradhëtojnë bashkëshortin. Nuk e dua për askënd. Nuk
e dua as për vrasësit, për mafiozët, për tradhëtarët e për tiranët. Nuk
e dua për hakmarrje, e as për t’u çliruar nga të burgosur të rrezikshëm e të kushtueshëm
e madje, as për mëshirë, siç thuhet nganjëherë. Pasi kërkoj një drejtësi
më të madhe! E duhet ecur në këtë rrugë për ta pohuar gjithnjë e më tepër, në të mirë
të të gjithëve, dinjitetin e njeriut e të jetës njerëzore, të cilën nuk mund ta përdorim
si të duam. Siç thotë Katekizmi i Kishës Katolike, duke cituar Papën Gjon Pali II,
sot, për shtetet, rastet e nevojës absolute për t’u hequr jetën fajtorëve, që të mos
bëjnë më dëm “janë shumë të rralla, e madje, praktikisht të paqena” (n. 2267). Le
t’i bëjmë plotësisht të paqena. Është njëqind herë më mirë!”