У Загрэбе сёння пачалася Пленарная асамблея Рады Канферэнцый Каталіцкіх Біскупаў Еўропы

Яна будзе праходзіць да 3 кастрычніка і прысвечана праблемам дэмаграфіі і сям'і. Сёння ўдзельнікаў павітала прэм’ер-міністр краіны Ярданка Консар. Заўтра біскупаў прыме прэзідэнт краіны.
Папярэдне ў дыяцэзіях было праведзена анкетаванне, якое дазволіла сабраць звесткі аб дэмаграфічнай эвалюцыі, удакладніць паказчыкі прыросту і іншыя параметры, звязаныя з сямейным фактарам, асабліва з улікам эміграцыйных працэсаў у Еўропе. Гэтым тэндэнцыям будзе прысвечана першая частка пасяджэнняў. Затым форум разглядзіць пытанні сучаснай сямейнай палітыкі ў розных еўрапейскіх дзяржавах і патрэбы пастырскай падтрымкі ў гэтай галіне.
У рамках сходу пройдзе падрыхтоўка да ўдзелу ў каталіцка-праваслаўным форуме “Адносіны паміж Касцёлам і дзяржавай”, які адбудзецца ў кастрычніку ў грэцкім Радосе.
У працах прымае ўдзел Мітрапаліт Мінска-Магілёўскі арцыбіскуп Тадэвуш Кандрусевіч, прадстаўнік Канферэнцыі Каталіцкіх Біскупаў у Беларусі.

Рада аб'ядноўвае кіраўнікоў 33 Біскупскіх Канферэнцый ў краінах Еўропы.