Vëzhguesi i Vatikani pranë OKB-së: mbrojtja e pronësisë intelektuale një e mirë për
të ndihmuar Vendet në zhvillim
Mbrojtja e pronësisë intelektuale është pjesë e mbrojtjes të të drejtave njerëzore
të sanksionuara nga Deklarata Universale e Kombeve të Bashkuara e mundëson përparimin
e një qytetërimi. Mirëpo që kjo të jap fryte reale të mirëqenies, sidomos në Vendet
që janë në zhvillim e sipër, lypet që këto norma të mbrojtjes të rregullohen nga regjime
të drejta. Kështu pohoi dje kryeipeshkvi Silano Tomasi, vëzhgues i përhershëm i Selisë
së Shenjtë pranë OKB-së në Gjenevë. Përfaqësuesi i Vatikanit foli në Asamblenë e 48-të
të përgjithshme të Organizatës botërore për Pronën intelektuale. Autori i një vepre
letrare, shkencore, artistike ka të drejtë ta mbrojë me ligje përkatëse krijimin e
veprat e veta, ashtu si edhe të nxjerrë prej tyre shpërblim moral apo ekonomik. Kështu
një krijim e vepër e tillë bëhet kontribut për zhvillimin kulturor të Vendit të vet,
për zhvillimin e kontinentit, e shpesh edhe të mbarë njerëzimit. Kjo e drejtë e pronësisë
intelektuale duhet të respektohet kudo e posaçërisht në Vendet në zhvillim e sipër.
Ekonomistët, vuri në pah vëzhguesi i Vatikanit, “njohin mekanizma të ndryshëm përmes
të cilëve të drejtat e pronësisë intelektuale (DPI), mund të nxisin zhvillimin ekonomik”.
Mirëpo rezultatet e një progresi të tillë, vijoi imzot Tomasi, deri më sot janë ende
“jo të plota e nga pak edhe kontradiktore”. Sot është urgjente të organizohet konvergjenca
e interesave të ndryshme në favor të reformës së pronësisë intelektuale në Vendet
në zhvillim e sipër e të mbështeten ato të ardhura që burojnë nga aftësia e krijimtarisë
intelektuale për zhvillimin e teknologjive e prodhimeve të reja, që sigurisht do të
shërbejnë për përparimin e gjithanshëm të Vendeve të përmendura.