Shugurimi diakonal i fra Aleksandër Tanushit në Gjakovë
Më 19 shtator në Kishën e shën Pjetrit e Palit në Gjakovë, u kremtua shugurimi diakonal
i françeskanit shqiptar Atë Aleksandër Tanushi. Meshën e shugurimit e kryesoi ipeshkvi
i vendit imzot Dodë Gjergji, në bashkëkremtim me gardianin e famullitarin e kësaj
bashkësie Atë Anton Nua, françeskanë e meshtarë të tjerë. Mbi këtë ditë feste e gëzimi
për bashkësinë kishtare të Gjakovës, të dëgjojmë njoftimin e Rabie Ibrajt nga Prishtina...... Në
homelinë gjatë meshës, ipeshkvi foli për rëndësinë e sakramentit të meshtarisë dhe
u bëri thirrje djemve të kësaj famullie të “lë gjithçka, ta marrin kryqin e Krishtit
e të shkojnë pas Tij”. Diakonati është hapi i parë drejt hirit të Urdhrit Meshtarak.
Është diakoni ai i cili ndihmon ipeshkvin dhe meshtarin në kremtimin e Meshës së Shenjtë.
Diakonit të ri ipeshkvi ia kujtoi detyrat dhe obligimet që i ka në kishë. Diakoni
duhet ta predikoj Ungjillin, ta dëshmojë atë dhe me jetën e vet ta jetojë. Diakoni
mund ti kryej të gjitha detyrat e meshtarit, përpos të kremtimit të meshës dhe sakramentit
të rrëfimit. Mesha u transmetua drejtpërdrejtë nga Radio Maria, kështu që shumë
njerëz patën mundësinë përmes valëve të kësaj radioje të marrin pjesë në këtë gëzim”. Gjatë
drekës imzot Doda i falënderoi të gjithë, por në veçanti e falënderoi nënën e fratit,
që e lindi dhe e rriti vetëm për Krishtin.
Kush është Fra Aleksandër Tanushi?
Fra Aleksandër Tanushi është nga Novosella e Epërme, famullia e shën Rrokut në
Novosellë. Është i lindur më 09 gusht 1983 në Gjakovë nga prindërit † Jozef dhe Veronika
Tanushi, l. Marjakaj. I pagëzuar është më 20 gusht 1983, ndërsa i krezmuar më 01 qeshor
1998. Shkollën fillore e ka përfunduar në Novosellë të Epër, kurse gjimnazin në Gjakovë. Në
postullatur të Rregullit Françeskan të Provincës Bosna Srebrena ka hyr në shtator
të vitit 2002. Zhgunin françeskan e ka veshur në Jajcë (Bosnjë) më 13. korrik 2003,
ku njëherë fillon noviciatin në Kuvendin Françeskan në Gorica – Livno. Kushtet e para
i pranon më 25 korrik 2004 në Gorica – Livno, kushtet e përjetshme, më 15 shtator
2008 në Bihać. Fra Aleksandri i ka përfunduar studimet të cilat kërkohen për shugurimin
diakonal. Me rastin e shugurimit diakonal i dëshirojmë shumë bekime në vreshtën e
Krishtit sipas karizmës françeskane. Jezu Krishti Zot qoftë ndihma e tij.