Përfundon sot udhëtimi apostolik i Papës në Mbretërinë e Bashkuar me beatifikimin
e kardinalit Njuman
Përfundon sot udhëtimi i Papës në Mbretërinë e Bashkuar, i cili pas ditës së parë
kaluar në Skoci e dy ditët tjera në Londër, sot kalon në Birmingém, ku do të kryesojë
Meshën e Shenjtë për beatifikimin e kardinalit britanik Njuman. Ceremonia në Cofton
Park të Birmingemit, ku Papa do të mbërrijë me helikopter, fillon në ora 10 lokale
(11 të Shqipërisë). Në mbarim të Meshës, Ati i Shenjtë Racinger do të lusë së bashku
me besimtarë e shtegtarë të pranishëm, lutjen e mesditës të Engjëllit të Tënzot. Pas
Meshe në ora 13,10 lokale është në program vizita private e Papës në oratorin e shën
Filip Nerit, ku Njuman, ish meshtari anglikan, jetoi që nga kalimi në Kishën katolike
më 1846 e deri në vdekje, më 18 gusht 1890. Sot pasdite, në ora 16,45 lokale, Papa
do të takohet me ipeshkvijtë katolikë të Anglisë, Uesllit e Skocisë në kapelën e Francis
Martin House pranë Oscott Collegge në Birmingem. Më pas, ceremonia e lamtumirës në
aeroportin e Birmingemit, e nisja e Papës për në Romë, ku parashikohet të mbërrijë
rreth orës 22,30.