(19.09.2010 RV)Festë e madhe: kështu e quan drejtori i Sallës së Shtypit të
Vatikanit, atë Federiko Lombardi, udhëtimin e Papës Benedikti XVI në Mbretërinë e
Bashkuar. Një vizitë që u parapri nga polemika e kundërshtime, por që Ati i Shenjtë,
sipas stilit të Shën Pjetrit, e ktheu në dëshmi të shpresës së krishterë, me ëmbëlsinë
e respektin që e karakterizon. Të dëgjojmë vetë atë Lombardin, në komentin javor të
së dielës: “Duke iu përgjigjur
në avion pyetjes nëse ishte i shqetësuar për kritikat e kundërshtimet që e prisnin
në Mbretërinë e Bashkuar, Papa iu përgjigj gazetarëve se nuk ishte aspak i shqetësuar,
se shkonte përpara me guxim e me gëzim. E shtoi edhe arsyen e guximit e të gëzimit:
tha se Kisha nuk duhet të punojë për t’u treguar e fortë dhe tërheqëse, por që përmes
saj, të bëhen transparente fjalët dhe personi i Jezu Krishtit. Nëse Kisha do të përpiqet
të jetë kështu për njerëzit që takohen me të, atëherë e ka bërë detyrën e vet, e ka
kryer misionin e s’ka asnjë arsye të ketë frikë. Këtu qëndron sekreti shumë i thjeshtë
i qetësisë së Papës, edhe në situata të vështira. Një qetësi, që bëhet ajo vetë mesazh
dhe shembull për besimtarët. Vërtet, sekreti është feja në Jezu Krishtin. Benedikti
XVI e propozon me inteligjencë, me besim e me gëzim, duke ditur e respektuar pyetjet
dhe vështirësitë e bashkëbiseduesve të vet. Jo më kot, duke kujtuar figurën e kardinalit
Njuman, vë në dukje modernitetin dhe kërkimin e tij të vazhdueshëm të së Vërtetës.
E di mirë se sot, takimi me Hyjin e me fenë e krishterë, nuk është i lehtë e i thjeshtë;
duhet një zë e një dorë mike, që ta propozojë qartë e t’i shoqërojë njerëzit me dashuri
në rizbulimin e bukurisë e të vlerës së propozimit të krishterë. A pranohet apo jo,
ky propozim? Këtu hyjmë, natyrisht, në hapësirën e lirisë së atyre që dëgjojnë dhe
në përgjegjësinë e ndërmjetësuesit të mesazhit, i cili mund ta lehtësojë ose ta vështirësojë
kuptimin e tij nga dëgjuesit. Por propozimi është i bukur: është oferta më e mirë
që mund të japë Papa. Prandaj e bën me gëzim. E kush e pranon ofertën, merr pjesë
në këtë gëzim”.