Papa lutet për viktimat e dhunës në Indi, Pakistan e Afganistan e kërkon respektimin
e lirisë fetare. Katekizmin e audiencës ia kushton Kjarës së Asizit.
Benedikti XVI në mbarim të audiencës së përgjithshme mbajtur sot në Sallën e Palit
VI në Vatikan, tha se është i shqetësuar për ngjarjet e dhunshme që këtyre ditëve
po ndodhin në Vende të ndryshme të Azisë dhe kërkoi të respektohet liria fetare. “Përcjell
me shqetësim ngjarjet që po ndodhin këtyre ditëve në rajone të ndryshme të Azisë Jugore,
posaçërisht në Indi, në Pakistan e në Afganistan. Lutëm për viktimat e kërkoj që të
respektohet liria fetare, e logjika e pajtimit dhe ajo e paqes të mbizotërojnë mbi
urrejtje e mbi dhunë”. E katekizmin e audiencës së përgjithshme, në vazhdim
të ciklit rezervuar figurave femërore më të rëndësishme në Kishën e Mesjetës, Benedikti
XVI sot ia kushtoi Kjarës së Asizit.
"Dëshmia e saj na tregon sa e mbarë
Kisha është në borxh me gratë guximtare e të pasura me fe siç ishte ajo, të afta të
japin shtytje vendimtare për ripërtëritjen e Kishës”.
“Një ndër shenjtëreshat
më të dashura”, Kjara jetoi në vitin 1200, - kujtoi Papa - e ishte prej një familje
fisnike e aristokrate, në moshën 18 vjeçare, e caktuar për martesë, “me një gjest
të guximshëm, të frymëzuar nga dëshira e thellës për të ndjekur Krishtin e nga admirimi
që kishte për Françeskun”, bashkëkohës i saj, la shtëpinë atërore, dhe me shoqen e
saj Bona nga Guelfuccio fshehurazi shkoi tek fretërit e vegjël në Porziuncola, e prej
aty shumë shpjet u transferua në Kishën e Shën Damjanit, ku në një kuvend të vogël,
jetoi për mëse 40 vjet deri në vdekje, më 1253, duke mishëruar në jetën e përditshme
“në mënyrë heroike virtytet që do të duhej të karakterizonin çdo të krishterë”, tha
Ati i Shenjtë Racinger duke përmendur këto virtyte: “përvujtërinë, përshpirtërinë
e pendesën, dashurinë e bamirësinë”: “Megjithëse ishte eprore, ajo
deshi t’u shërbente personalisht motrave rregulltare të sëmura, duke u marrë edhe
me punët më të rëndomta e teje të përvuajtura: e kështu dëshmoi se dashuria më të
vërtetë kalon çdo vështirësi, çdo pengesë, e kush dashuron çdo flijim e bënë me gëzim”.
E
kanonizuar nga Papa Aleksandri VI, vetëm dy vjet pas vdekjes, Kjara - tha Benedikti
XVI- ka qenë gruaja e parë në historinë e Kishës që përpiloi një Rregullore të shkruar
për jetën rregulltare “në mënyrë që karizma e shën Françeskut - i cili ishte “jo vetëm
mësues” por “edhe mik vëllazëror” - të ruhet e të zbatohet në të gjitha bashkësitë
rregulltare femërore të frymëzuara nga shembulli i dy shenjtorëve të Asizit, që ditën
të nxjerrnin “nga miqësia reciproke një shtytje të fortë për të përshkuar udhën e
përsosmërisë ungjillore”.
“Miq të dashur: shenjtorët janë ata që e ndryshojnë
botën në të mirë, që e shndërrojnë në mënyrë të qëndrueshme duke vënë energjitë që
vetëm dashuria e frymëzuar nga Ungjilli mund ti nxisë. Shenjtorët janë bamirësit e
mëdhenj të njerëzimit”!
E ndër besimtarët e shtegtarët e ardhur prej vendeve
të ndryshme të botës në Vatikan, për të marrë pjesë në audiencën e përgjithshme me
Papë, sot ishin edhe dy grupe të ardhura nga Irani e nga Guineja. Gjatë përshëndetjeve
drejtuar të pranishmëve në përfundim të katekizmit, Papa porositi të ndiqej shembulli
i Zojës së Bekuar të Dhimbshme - festa e së cilës bie sot - e cila “ me fenë e saj
të gjallë qëndroi pranë kryqit të Birit të vet”. “Të dashur të rinj,
mos keni frikë të qëndroni edhe ju si Maria pranë Kryqit. Zoti do të jap guximin për
të tejkaluar çdo pengesë e vështirësi në jetën tuaj të përditshme. E ju,
të dashur të sëmurë, uroj të gjeni në Marinë ngushëllimin dhe mbështetjen për të
mësuar nga Krishti i Kryqëzuar vlerën shpëtimprurëse të vuajtjes. Ju të
dashur të sapo martuar, drejtohuni me besim në momente të vështira Zojës së Dhimbshme,
që të ju ndihmojë me ndërmjetësimin e saj amënor”.