(14.09.2010 RV)Me rastin e 100-vjetorit të lindjes së Nënë Terezës, “Nënës
së të varfërve” dhe “Çmimit Nobel për paqen 1979”, UNESCO dhe Delegacioni i Përhershëm
i Indisë pranë selisë së Parisit të kësaj organizate të OKB-së organizuan sot një
takim tematik, ku u shfaq një dokumentar mbi jetën dhe veprën e së Lumes shqiptare
të bamirësisë, u dha një koncert nga Kori i Këngëtarëve të Vegjël të Versajës dhe
u dëgjuan disa dëshmi. Relacioni kryesor u mbajt nga Vëzhguesi i Përhershëm i
Selisë së Shenjtë në UNESCO, imzot Françesko Folo, i cili u ndal në mënyrën si e kuptonte
bamirësinë Nënë Tereza. Takimin e mbylli me një reflektim të vetin, këshilltarja e
Misionareve të Bamirësisë në Kalkutë, motër Joana. Po sot, u përurua ekspozita
fotografike me titull “Nënë Tereza: jeta dhe mesazhi”, që do të qëndrojë e hapur në
selinë e UNESCO-s në Paris, deri më 30 shtator.