Benedikti XVI në tokën britanike: vizita e parë shtetërore e një Pape në Mbretërinë
e Bashkuar
“Zemra i flet zemrës”: është fraza e zgjedhur nga Papa Benedikti XVI për të karakterizuar
udhëtimin e tij apostolik në Mbretërinë e Bashkuar, marrë nga motoja kardinalore e
të lumit të ardhshëm, kardinalit Henri Njuman. Ati i Shenjtë do të mbërrijë në tokën
britanike të enjten, pas dy ditësh, e do të qëndrojë deri të dielën në qytetet e Edimburgut,
Glasgout, Londrës dhe Birmingamit. Kjo është vizita e parë shtetërore e një pape në
Mbretërinë e Bashkuar, pas katër vizitave të një sovrani britanik në Vatikan. Ndër
etapat më domethënëse të udhëtimit të ardhshëm apostolik të Benediktit XVI është pa
dyshim, lumnimi i kardinalit Xhon Henri Njuman, të dielën. Që i ri, Jozef Racinger
e ka konsideruar gjithnjë teologun e njeriun anglez të letrave si model për t’u ndjekur
e shpesh ka reflektuar mbi teologjinë e tij të ndërgjegjes. Po përshkojmë disa nga
këto reflektime, të shoqëruara nga notat e “Lead kindly light” (Na udhëhiq o dritë
e ëmbël), himn i kompozuar nga vetë kardinali Njuman në vitin 1833. Për kardinalin
Njuman, shkruan Papa në kohën kur ishte ai vetë kardinal, ndërgjegjja nuk do të thotë
vetëvendosje e subjektit, në një botë pa të vërteta. Do të thotë përkundrazi, prani
e perceptueshme e së vërtetës nga vetë subjekti, pra njeriu. Në listën e virtyteve,
Njuman nënvizon rëndësinë më të madhe të së vërtetës mbi mirësinë, ose për ta thënë
në një mënyrë më të kuptueshme për ne – shpjegon Benedikti XVI – rëndësinë e së vërtetës
mbi konsensusin, mbi pranimin nga ana e grupit, ku çdo njeri bën pjesë. Gjatë vizitës
së fundit të ipeshkvijve të Anglisë e të Uellsit, në shkurtin e këtij viti, Papa theksoi. “Kardinali
Njuman na ka lënë një shembull të jashtëzakonshëm besnikërie, duke ndjekur atë “kindly
light”, atë dritë të ëmbël, kudo ku ajo e çonte, edhe nëse i duhej të paguante një
çmim të lartë personalisht”. E më pas, Benedikti XVI uron: “Shkrimtarë
e komunikues të mëdhenj, me integritetin dhe personalitetin e tij, janë të nevojshëm
për Kishën e sotme e shpresoj që përkushtimi ndaj tij, të frymëzojë shumë vetë për
të ndjekur gjurmët e kardinalit Njuman”. I është kushtuar shumë vëmendje aktivitetit
akademik të kardinalit, por – thekson Papa – duhet pasur parasysh se ai ishte sidomos
meshtar. Jozef Racinger e vlerëson shumë teologjinë e kardinalit Njuman, i cili e
shpjegonte ekzistencën e njeriut, duke filluar nga ndërgjegjja, apo nga marrëdhëniet
ndërmjet Zotit e shpirtit. Ky lloj personalizimi – shpjegon Papa – nuk përfaqëson
ndonjë rrugë drejt individualizmit dhe arbitraritetit, por është rrugë njohjeje e
zhvillimi, që e çon shpirtin drejt së vërtetës. Për këtë arsye, kardinali Njuman u
kthye nga feja anglikane në fenë katolike; për këtë arsye, i ngjan kaq shumë shën
Augustinit, nënvizon Benedikti XVI.