Shenjtorët e Javës sipas kalendarit Kishtar 12 - 19 shtator
Sot e diel 12 shtator, kisha kremton të dielën e 24-të gjatë vitit Kishtar
e po sot kalendari liturgjik përkujton edhe festën e Emërit të Shenjtë të së Lumes
Mari Virgjër, shën Guido nga Brabanti e Shën Silvani i Veronës. Emri i Zojës Mari
na kujton se nuk mund të quhemi ndjekës të Krishtit, në se nuk jemi edhe njerëz të
uratës. Jezusi kalonte netë të tëra në lutje, duke na mësuar të vërtetën se bota kthehet
në rrugën e Zotit ‘me gjunjë’. Nësër e hënë 13 shtator, bie festa
e shën Gjon Gojartit, ipeshkëv e doktor, këndues i mrekullueshëm i lavdisë së
Zotit. Liturgjia e ditës na kujton se revolucionari më i madh që njeh historia është
Jezusi: duke shpallur Ungjillin, në mënyrë të veçantë ‘Lumnitë’, Krishti revolucionarizoi
mendësinë e mbarë popujve dhe vuri në jetë një ligj të ri.
Të martën
që vjen, më 14 shtator, kalendari kishtar kremton festën e Naltimit të Kryqit të Shenjtë,
siç njihet tek popullit shqiptar, festa e Shëna Kryqit, e përkujton edhe Shën Albertin,
patrik të Jerusalemit. Je ti, o Zot, shpëtimi jonë. I lartuar mbi drurin e Kryqit,
Biri i Zotit, Jezus Krishti Shpëtimtar, shëlbon gjithësinë dhe personat. Cdo herë
që bëjmë shenjën e kryqit, ne rrëfejmë se prej Krishtit na është dhënë të gjithëve
jeta e amshuar. Festa e Naltimit të Kryqit të Shenjtë kremton një fakt historik
të epokës së perandorit Konstandinit e nënës së tij Helenës, kur qe zbuluar mbi Golgotë
në Jeruzalem Kryqi, mjeti i vdekjes së Krishtit. Ky Kryq i Krishti gjendet në Bazilikën
e Jeruzalemit. Të mërkurën më 15 shtator, kalendari kishtar do të
kremtojë një nga festat më prekëse që ka për zemër populli besimtar, atë të Zojës
së Dhimbshme. Në dhimbje, më ndihmo, o Zot. Martire megjithëse pa vdekur
është Maria nën kryqin e të Birit. Nga shkatërrimi e dhimbja do të vijë ngjallja;
në vend të Birit të humbur, do të ketë një mori e madhe besimtarësh në Krishtin. Të
enjten më 16 shtator kalendari kishtar përkujton Shenjtorët Korneli papë e Çipriani
ipeshkëv, martirë, Eufemia martire e Vitori, papë. Jeta shenjtorëve na kujton
se ta jetosh e ta kumtosh Ungjillin, shpesh herë do të thotë t’i kundërvihesh kulturës
në të cilën jeton. Na shtyn të mos pranojmë atë që duket se e pranojnë të gjithë e
na kujton se, ndryshe nga të tjerët, ne nuk i pranojmë kënaqësitë dhe pushtetin e
kësaj bote, në të cilën jemi shtegtarë që ecin drejt një bote më të mirë.
Të
premten e ardhshme më 17 shtator kalendari kishtar feston Shën Robert Belarminin,
kardinal, ipeshkëv e doktor i Kishës që kujtojmë se ndër njerëzit që i thërret Zoti
e i dërgon të përhapin lajmin e mirë, jemi edhe ne. Çdo i krishterë dëgohet në botë
për të dëshmuar dashurinë që na ka dhuruar Krishti. Për këtë jemi të sigurtë. Të
shtunën më 18 shtator, sipas kalendarit kishtar bie kujtimi i Shën Jozef Kopertinit,
meshtar françeskan, që na kujton se të jesh i krishterë, do të thotë të jesh i
sigurtë se Zoti kujdeset për ne në çdo çast të jetës. E kjo na jep zemër ta shpallim
haptazi besimin tonë në Zotin, duke e pasur mirë parasysh se feja nuk është ndjenjë
private, por dëshmi publike! Të dielën e ardhshme më 19 shtator, Kisha kremton
të dielën e 25-të gjatë vitit kishtar e na propozon festën e Shën Gjenarit, ipeshkëv
i Beneventos e martir. Psalmi i kësaj dite thotë: pa mbarim do ti këndojë mirësisë
së Zotit. Tërë personi i Jezusit, edhe trupi i tij, shpreh forcën që pambarimisht
jep shëndet e guxim. Ja udhët për të fituar shpëtimin prej Zotit: të bëhemi nxënës
të tij e ti dëgjojmë e zbatojmë mësimet e apostujve, të cilët na propozojnë ato udhëzime
që Mësuesi Hyjnor ua ka besuar atyre.