64 vjetori i kryengritjes antikomuniste në Postribë
Përkujtojmë sot kryengritjen Antikomuniste organizuar në Postribë, 64 vjet më parë.
Ishte pra 9 shtatori i vitit 1946, që shënoi revoltën e parë antikomuniste e me përmasa
të mëdha, pasi në të u përfshinë me armë në dorë burra të Postribës, Shkodrës, Gurit
të Zi, Rrethinave, Oblikës e më gjerë, e kështu u shtri në një kryengritje të vendosur
shqiptare antikomuniste, e cilësuar e para e këtij në Shqipëri. Një pjesë e protagonistëve
të kësaj ngjarje historike për Shqipërinë dhanë jetën, të tjerë u burgosën, u internuan
dhe u persekutuan përgjatë viteve të errëta e mizore të periudhës së diktaturës komuniste.
Kryengritja e Postribës e 9 shtatorit 1946, qe e motivuar dhe e organizuar. Që në
fillim postribasit dhe jo vetëm ata ishin të vetëdijshëm se e ardhmja e tyre nuk ishte
komunizmi. Ata e dinin se prona nuk do te ishte më e tyre, e dinin se komunistët nuk
e pranonin besimin fetar në Zotin, i cili u vërtetua me një përndjekje e tortura të
pashembullta, e kështu sakrifikuan jetën e tyre dhe atë të familjeve. Në kryengritje
nuk morën pjesë vetëm një grusht njerëzish, as vetëm ata që u prekën nga komunizmi,
por gjithë populli i zonës, duke shënjuar kryengritjen e parë antikomuniste në Shqipëri
Kur përkujtojmë këtë ngjarje, vlerësojmë faktin se shqiptarët qenë gjithmonë njerëz
që e kërkuan lirinë, qenë të parët që flijuan jetën për liri dhe qe vërtet sakrificë
e madhe e paguar me gjak, me jetë, me sulme e me përndjekje që regjimi komunist i
bëri Postribës, Shkodrës e tërë popullit për ta mbajtur pastaj nën hijen e frikës
dhe burgut, duke shkatërruar edhe të gjithë shoqërinë shqiptare,të gjithë shqiptarët,
që kaluan një kalvar të tmerrshëm, një periudhë nën errësirë të plotë të zhytur në
vlera antinjerëzore, antishpirtërore, antimorale e antishqiptare.