Апублікавана пасланне Святога Айца Бэнэдыкта XVI на 26-ты Сусветны дзень моладзі,
які адбудзецца ў Мадрыдзе
У сваім пасланні на
26-ты Сусветны дзень моладзі Святы Айцец кажа аб тым, што ва ўсе часы, а асабліва
сёння многія маладыя людзі маюць моцнае жаданне будаваць свае адносіны з іншымі на
падмурку праўды і салідарнасці. Многія жадаюць спазнаць сапраўднае сяброўства, каб
на ім пазней будаваць каханне і сям’ю, каб разам з другой асобай дасягнуць асабістай
стабільнасці, якая можа забяспечыць мірную і шчаслівую будучыню.
«Узгадваючы
сваю маладосць, — піша Папа, — я разумею, што стабільнасць і бяспека не з’яўляюцца
пытаннямі, над якімі задумваецца большасць маладых людзей. Так, пытанне працаўладкавання,
каб мець цвёрдую глебу пад нагамі, вялікія надзённыя праблемы турбуюць сённяшнюю моладзь,
але ў той жа час маладосць — гэта той узрост, калі чалавек знаходзіцца ў пошуках вялікага
жыцця. Калі я думаю пра той час, узгадваю нашае жаданне нечага вялікага і новага.
Мы хацелі знайсці само жыццё ў яго прасторы і прыгажосці».
У сваім пасланні
Бэнэдыкт XVI прапануе маладым людзям вырушыць у падарожжа веры ў Бога, Айца нашага
Пана Езуса Хрыста. «Вы — будучае грамадства і Касцёла! — чытаем у пасланні Пантыфіка.
— Як апостал Павел пісаў да хрысціянаў у горадзе Калос, неабходна мець карані і цвёрды
фундамент! Гэта асабліва актуальна сёння, калі многія не маюць стабільных арыенціраў,
з дапамогай якіх маглі б будаваць сваё жыццё».
«Дарагія сябры, — працягвае
Святы Айцец, — я зноў запрашаю вас прыехаць на Сусветны дзень моладзі ў Мадрыд. З
глыбокай радасцю я чакаю кожнага з вас асабіста: Хрыстус хоча, каб вы былі цвёрдыя
ў веры праз Касцёл. Выбраць веру ў Хрыста і ісці за Ім — нялёгка, бо перашкаджаюць
нашыя здрады і шматлікія галасы, якія кіруюць на лёгкі шлях».
«Дарагая моладзь,
Касцёл разлічвае на вас! — падрэслівае Бэнэдыкт XVI напрыканцы свайго паслання. —
Яму неабходна ваша жывая вера, творчая любоў і дынамізм надзеі. Ваша прысутнасць у
Касцёле адраджае яго і надае яму новы імпульс. Таму Сусветны дзень моладзі — гэта
ласка не толькі для вас, але і для ўсяго Народу Божага».
Сустрэча ў Мадрыдзе
адбудзецца 15–21 жніўня наступнага года. Аб сваім удзеле ў ім заявілі ўжо каля 600
тысяч маладых людзей з усяго свету.