Në pritje të Papës, ipeshkvijtë anglezë përmes një video tregojnë përvojën e tyre
të fesë.
“Zemra i flet zemrës”: duke iu referuar motos së udhëtimit apostolik të Benediktit
XVI në Britaninë e Madhe, nëntë ipeshkvij të Vendit kanë realizuar një seri me video,
ku tregojnë “udhëtimin fesë” së tyre. Disa prelatë kanë rrëfyer përvojat personale,
madje edhe të dhimbshme për të nënvizuar ngushëllimin e madh që kanë marrë nga lutja
drejtuar Zotit e nga marrëdhënia personale me Hyjin. Janë histori që burojnë nga
thellësia e zemrës, në shenjë të kardinalit Njuman e të Benediktit XVI: me këtë frymë
nëntë barinj shpirtëror anglezë kanë treguar, përmes një serie video klipi, përvojën
e takimit të tyre me Jezu Krishtin Zot. Kryeipeshkvi i Liverpulit, Patrick Kelly,
kujton emocionin e jetuar në një shtegtim të tij në Tokën e Shenjtë dhe ofron një
reflektim mbi udhëtimin e ardhshëm të Papës në tokën britanike: “Konteksti i
vizitës së Atit të Shenjtë është ripohuar nga bindja me të cilën ai e ka filluar Letrën
e tij të parë Enciklike, ‘Deus Caritas est’ - Zoti është dashuri. Në Enciklikë Papa
insistonte mbi faktin që të jesh i krishterë nuk është, në rend të parë, një ide e
lartë apo e madhe, e aq më pak një përcaktim etik; të jesh i krishterë do të thotë
dhe është takim me një ngjarje, me një Person. I vetmi Person vdekja e të cilit mund
të pajton: Jezu Krishti, Biri i Hyjit të gjallë”.
Nga ana e tij, imzot
John Arnold, ipeshkëv ndihmës i Westminsterit u rrëfen besimtarëve ndjenjat që provoi
në ditën e vdekjes së nënës së tij. “Ndjeva që Zoti ishte i pranishëm”, pohon, “një
eksperiencë që më ka prekur thellësisht në jetë”. Imzot Kieran Conry, ipeshkëv
i Arundel e Brighton tregon përvojën prekëse të kremtimit të një Meshe brenda një
katakombe romake. Kujtoj lotët e emocionit kur mendoja se në atë vend janë varrosur
të krishterët e parë për shkak të fesë tyre të bindur në Krishtin. “E kuptova - pohon
imzot Conry - se jam pjesë e një historie të madhe”. Ipeshkvi i Wrexham, Edwin
Regam, është ndalur tek bukuria e krijimit, shenjë e dashurisë së Zotit. Ipeshkvi
i Portsmouth, Crispian Hollis, ka prekur temën e udhëtimit, gjuhën e zemrës, duke
i këshilluar anglezët të ndalen për të reflektuar, duke lejuar të takohen nga Jezusi
Zot. “Sot, jetojmë në një bot, kaq hiperaktive dhe të impenjuar, e kjo është
diçka shumë e mundimshme e shpreh edhe pak prodhuese. Sugjerimi im kujtdo që ndjehet
i shtypur nga ky lloj presioni është të ketë guxim për të pasur besim e për t’u mbështetur
tek të tjerët, sidomos në Krishtin Zot: Hyji është Hyj i dashurisë dhe i mirëkuptimit,
i faljes dhe i pajtimit”.