E Lumja Nënë Terezë, në 100 vjetorin e lindjes: Gëzimi- paradoks i dritës
Në kuadrin e Jubileut të 100 vjetorit të lindjes e të 13 vjetorit të kalimit në amshim
të së Lumes Nënë Terezë, vijojmë të njihemi çdo ditë nga pak e nga afër me jetën e
veprën e kësaj gjigante të shpirtit njerëzor, që tërë jetën e shkriu duke dashur e
shërbyer njeriu nevojtar për dashuri ndaj Krishtit Zot e Shpëtimtar. E në jetën e
veprimtarinë e saj në ndihmë të të varfërve e të mënjanuarve, e Lumja Nënë Terezë
është ndeshur në shumë vështirësi, ka përjetuar çdo lloj kundërshtie e pengese, mirëpo
ajo edhe në çastet më të errëta e më të vështira, përherë e kurdoherë ka qëndruar
besnikërisht në Udhën që Jezusi ia tregoi, madje duke u bërë bartëse e gëzimit dhe
shpresës për ata njerëz të varfër e të nëpërkëmbur që shpresë nuk kishin, e jo vetëm
atyr, por të pasurve të varfër.....siç dëshmon edhe ky reflektim që po ju propozojmë
sot. Gëzimi- paradoks i dritës. Një nga karakteristikat
më simbolike të fesë e të dashurisë së Nënë Terezës gjatë errësirës së saj të dhimbshme
shpirtërore qe gëzimi i përhershëm që rrezatonte: nuk buronte nga temperamenti, as
nga prirja e saj natyrore: ishte fryt i hirit të Hyjit e i lëshimit të plotë në duart
e tij. E kjo kërkonte një përpjekje të vetëdijshme e të vendosur. Në çastet më të
vështira buzëqeshja e saj bëhej edhe më e ndritshme. Nënë Tereza kishte vendosur
të bëhej "apostulle e gëzimit" dhe ta përhapte erën e mirë të haresë së Krishtit kudo
që shkonte. Dashuria e saj për Zotin ishte aq e madhe, sa ajo nuk donte tjetër, veç
të rrokte kryqin, e ta rrokte me gëzim. "Qëllimi im i dytë [i ushtrimeve shpirtërore]
është të bëhem apostulle e gëzimit e ta ngushëlloj Zemrën e Krishtit me gëzimin tim.
Lutuni Zojës së Bekuar të ma japë Zemrën e saj, kështu që të mundem ta çoj deri në
fund dëshirën e Tij për mua. Dua t'i buzëqesh gjithnjë edhe vetë Krishtit, me shpresë
se kështu do të mund t'ia fsheh edhe atij vetë, në se është e mundur, vuajtjen dhe
errësirën e shpirtit tim". Vendosa, kështu, t'i buzëqesh Jezusit sa herë që Ai të
marrë diçka prej meje. Si shkëmbim do t'i dhuroj një buzëqeshje të dalë nga zemra,
duke e falënderuar që ai e merr mundimin të përkulet endč për të marrë diçka nga unë". Ndonëse
dëshira e Nënë Terezës "për t'ia fshehur dhimbjen deri Krishtit ishte sigurisht e
pamendueshme, ajo ia doli mbanësh t'ua fshehte këtë dhimbje të gjithëve, deri njerëzve
më të afërt. "Nganjëherë dhimbja është aq e fortë, sa më duket se gjithçka brenda
meje thyhet copë-copë. Atëherë buzagazi bëhet mantel që mbulon dhimbjen e pakufishme".
Dashuria e saj pa kurrfarë interesi rrezatonte "Dashurinë e Tij, praninë e Tij, mëshirën
e Tij". Nënë Tereza kishte dhuratën e posaçme t'ia përcillte dashurinë e Zotit
të tjerëve. Gëzimi, që i buronte nga dashuria për Krishtin, ndriçonte edhe ndër provat
më të vështira. Duke e takuar, qoftë edhe për pak kohë, ata që kishin humbur shpresat,
që i kishte pushtuar dëshpërimi, ndaheshin nga ajo plot ngushëllim e shpresë. I pati
shkruar simotrave: "Mos harroni se mundimet e Krishtit përfundojnë gjithnjë me gëzimin
e Ngjalljes së Tij. Prandaj, kur i ndjeni në zemrën tuaj mundimet e Krishtit, nuk
duhet të harroni se do të vijë Ringjallja, se do të shpërthejë gëzimi i Pashkëve.
Asgjë nuk duhet t'ju bëjë të vuani aq shumë, sa të harroni gëzimin e Krishtit të ngjallur.
Këtë nuk duhet t'ia lejoni kurrë vetes.
Ç’është gëzimi? Gëzimi është
dashuri, pasojë logjike e një zemre që digjet nga dashuria. Gëzimi është
nevojë, është forcë fizike. Llamba jonë do të ndizet nga flijimet e bëra
me dashuri, vetëm në se janë përplot me gëzim! Nënë Tereza