Romët: Kardinali i Parisit kritikon “lojën e fjalëve”
(27.08.2010 RV)Kryetari i Konferencës ipeshkvnore franceze, kardinali Andre
Vënt-Trua, kritikoi lojën e fjalëve, që po përdor qeveria, për t’i bindur njerëzit
se qëndrimi ndaj romëve ka të bëjë me politikën qeveritare kundër pasigurisë. Po
krijohet një klimë e sëmurë në shoqërinë tonë, një farë shkallëzimi i opinioneve të
ndryshme e një farë gare ndërmjet atyre, që duket sikur punojnë për t’i dhënë vendit
më shumë siguri e atyre, që dyshojnë se kjo sjellje nuk është e moralshme. Kështu
u shpreh sot kardinali i Parisit në mikrofonin e Radios Evropa, duke theksuar se
në një shoqëri civile e paqësore, diskutimi duhet bërë në mënyrë më të qetë. Përsa
u përket riatdhesimeve të fundit të romëve, prelati i lartë shpjegoi se Franca, natyrisht,
nuk duhet t’i pranojë të gjithë romët e se javët e ardhshme do të takohet me ministrin
e brendshëm Hortefë: “Nuk do t’i them ç’duhet të bëjë për ta ndryshuar mënyrën si
po vepron, shpjegoi kardinali, do t’i them vetëm ç’ mendojnë katolikët për masat e
marra e për zbatimin e tyre, duke i kujtuar se ka disa kufij, që nuk duhen kapërcyer”. Pak
ditë më parë ministri Hortefë theksoi se është gati ta presë kardinalin e Parisit,
pas kritikave të Papës e të përfaqësuesve të tjerë të Kishës katolike për dëbimin
e romëve nga Franca. Kujtojmë se të dielën e kaluar, gjatë përshëndetjeve, drejtuar
shtegtarëve, duke folur në gjuhën frënge, Papa pohoi se shëlbimi u përket të gjithë
njerëzve. E kjo ishte edhe ftesë për t’i pranuar të gjithë, pavarësisht nga raca,
populli e kombi, të cilit i përkasin.